Dean Henderson ka konfirmuar atë që i tha Pep Guardiolës së zemëruar pasi Crystal Palace mposhti Manchester Cityn 1-0 në finalen e Kupës FA.
Palace siguroi trofeun e parë të madh në Wembley, me golin e Eberechi Eze në pjesën e parë që shënoi diferencën.
Henderson priti një penallti nga Omar Marmoush para pushimit mes pjesëve, së bashku me një numër pritjesh të tjera të rëndësishme.
Por City mendonte se portieri i Palace duhej të ishte përjashtuar disa minuta para penalltisë për shkak se i mohoi një mundësi të pastër për të shënuar gol.
Henderson e preku topin me dorë jashtë zone duke e larguar atë nga Erling Haaland që po sulmonte.
Por, VAR vlerësoi se Haaland do ta kishte çuar topin shumë larg portës dhe kishte një mbrojtës që ishte në linjë me sulmuesin norvegjez.
Pas ndeshjes, Guardiola refuzoi t’i shtrëngonte dorën Hendersonit dhe dukej sikur i tha me zë të lartë “kjo nuk është e drejtë” portierit të Palace dhe të Anglisë.
Mirëpo, pamjet e mëtejshme treguan komentet e bëra nga Guardiola dhe Henderson që filluan shkëmbimin e tërbuar.
Në një intervistë me Gabriel Clarke të ITV, Henderson konfirmoi më pas se Guardiola kishte problem me atë që ai e perceptonte si humbje kohe nga Palace në pjesën e dytë, pavarësisht se gjyqtari Stuart Attwell shtoi 10 minuta kohë shtesë.
Henderson deklaroi: "Shkova vetëm t'i shtrëngoja dorën, por sigurisht që mendoj se ai ishte i zhgënjyer nga humbja e kohës".
"Unë i thashë, 'I more 10 minutat që doje'. Por po, nuk kam ndjenja të këqija".
"Është e pabesueshme. Ata (tifozët e Palace) do ta kujtojnë këtë përgjithmonë, ashtu si ne", shtoi më tej Henderson. /Telegrafi/
