Hendbollistët e Universitetit të Prishtinës fitojnë Kupën Botërore Universitare

Hendbollistët e Universitetit të Prishtinës e kanë fituar Kupën Botërore Universitare që të dielën përfundoi në Prishtinë.

Në finalen dramatike dhe shumë të bukur, hendbollistët tanë kanë fituar ndaj universitetit të Koresë së Jugut me rezultatin 33-30. Ndeshja u luajt në atmosferë të shkëlqyeshme para rreth 1.500 shikuesve në palestrën “1 Tetori”.

Hendbollistët e UP-së kanë filluar herët shkëputjen në rezultat. Pas 30 minutave rezultati ishte 19-17 për hendbollistët tanë. Edhe në pjesën e dytë epërsia e UP-së ishte konstante. Por, jugkoreanët nuk janë dorëzuar deri në fund, duke e bërë kështu ndeshjen shumë interesante dhe dramatike.

Cilësia e djemve tanë ka ardhur në shprehje dhe ata kanë mbyllur finalen me fitore.

Drenit Tahirukaj është shquar me nëntë gola. Gjashtë i shënoi Atdhe Basholli, ndërsa pes i kishte Jon Muqolli. Me pritje të shumta është dalluar edhe Arti Luzha.

Është ky një tjetër sukses i hendbollistëve tanë dhe hendbollit kosovar në përgjithësi. Kjo përvojë do t’iu shërbejë lojtarëve si motivim për sfidat tjera në karrierë.

Te hendbollistet titullin e kampionit e ka fituar Universiteti nga Koreja e Jugut.