Hendboll, Florian Tasholli pritet t’i bashkohet ekipeve të grupmoshave të reja të Kosovës

Florian Tasholli pritet t’i bashkohet ekipeve të grupmoshave të reja të Përfaqësueses së Kosovës në hendboll në të ardhmen e afërt.

Shtatlarti Tasholli ka vizituar Federatën e Hendbollit të Kosovës dhe ka shprehur gatishmëri që të luajë për Kosovën në të ardhmen.

Tani mbetet te trajnerët e grupmoshave të reja të vlerësojnë lojtarin dhe eventualisht të ftojnë atë, shkruan Kosovahandball.info.

Tasholli është i lindur më 28 janar të vitit 2003 në Heidenheim të Gjermanisë. Aktualisht është në grupmoshat e reja të klubit gjerman Steinheim.

Është duke u zhvilluar si lojtar, ndërsa ka gjatësi të duhur për hendboll. Është i gjatë 190 centimetra dhe peshon 90 kilogramë.

Federata e Hendbollit të Kosovës mirëpret vendimin e Tashollit që të jetë në dispozicion të Kosovës dhe pret që njëjtë të veprojnë edhe lojtarë tjerë që bëjnë karrierë në vende evropiane.

Ekipet kombëtare të Kosovës kanë qenë, janë dhe do të jenë të hapura për të gjithë lojtarët cilësorë nga Kosova, pavarësisht nëse ata bëjnë karrierë në klube të vendit apo në klube të huaja.