​Haziri beson se LDK-ja do të fitojë pa balotazh në Gjilan

Kandidati i LDK-së për Gjilanin, Lutfi Haziri u shpreh i bindur se kjo parti ka fituar bindshëm në këtë komunë.

Haziri në një konferencë për media ka thënë se do të konfirmohen bindshëm dhe pa balotazh fitues.

“Sipas shënimeve të para dhe mostrat që LDK i merr nga terreni dhe exit-poll natyrisht ne jemi fitues të dyfishtë. LDK ka fituar edhe për zgjedhjet për kryetar komune, ka fituar edhe zgjedhjet për parti në kuvend komunal. Dhe jemi në përqindje dhe diferencë të qëndrueshme dhe shënimet tona thonë që nga rezultatet ku nuk ka pasur marzhë të exit-poll, LDK prin larg dhe do të dalim mbi marzhën e gabimeve të exit-poll. Që nënkupton që deri në mesnatë do të dalim pa balotazh fitues. Dhe kjo na bën të përgjegjshëm të përgjegjshëm dhe krenar”, tha Haziri.

Lexo po ashtu EXIT POLL-i nga UBO në RTV Dukagjini: Gjilani shkon në balotazh mes LDK-LVV

Ai më tej ka shtuar se LDK ka përmbysur rezultatin në raport me Lëvizjen Vetëvendosje.

“Rezultatet e para të exit-poll dhe mostrat po tregojnë se LDK ka fitore bindëse. Ky është rikthim i madh i LDK-së sepse ka përmbys një rezultat që ka qenë me 63 në raport me LVV. Ky rikthim i besimit vetëm për disa muaj ne na bën më të përgjegjshëm para qytetarëve”, ka shtuar ai.