Harta e rrallë detare, me toponimin “Scandrebeco”

Në mbyllje të vitit jubilar mbarëkombëtar të Gjergj Kastriot Skënderbeut dhe në prag të festave të nëntorit, ekspozohet në Sallonin e Kryeministrisë “Harta Detare Një”, e njohur ndryshe si “Carta Nautica Uno”, një artefakt i rrallë historik, i realizuar në vitin 1455, nga kartografi gjenovez Bartolomeo Pareto.

Harta e realizuar për papën Nikolla V, vjen për shqiptarët nga Biblioteka Kombëtare Qendrore e Romës në Itali. Ajo mbart një rëndësi të veçantë historike sepse vizualizon elemente dekorative dhe shenjon vende me interes të posaçëm; rrëfen një bashkëkohësi ngjarjesh historike, në mënyrë të veçantë trysninë osmane në Evropë, e posaçërisht në gadishullin e Ballkanit.

Veçmas aty, në hapësirën e Arbërit, shquhet një toponim i pazakontë “Scandrebeco”. Ky toponim i ngulët në qendër të hartës, përfaqëson jo vetëm një zbulim të mirëfilltë në rrafsh albanologjik, por edhe një kontribut të paçmuar në zdritjen e personalitetit real të heroit arbëror Gjergj Kastriotit. “Carta Nautica Uno” do të ekspozohet për publikun deri më 15 dhjetor 2018.