Harrojeni terrorizmin, ky është armiku më i rrezikshëm që mund ta imagjinoni – drejtori i OBSH-së thotë se coronavirusi mund të bëjë kërdinë

Drejtori i Përgjithshëm i Organizatës Botërore të Shëndetësisë, Tedros Adhanom Ghebreyesus, u bëri thirrje vendeve të përgjigjen fuqishëm ndaj coronavirusit ndërsa ai është relativisht i përmbajtur sepse një mos veprim i menjëhershëm do të kishte pasoja shumë të mëdha.

Madje, sipas tij, shkruajnë mediat e huaja, përcjell Telegrafi, ky virus mund të shkaktonte një “kërdi” më të madhe edhe se të një sulmi masiv terrorist.

“Për të qenë i sinqertë, një virus është më i fuqishëm në krijimin e trazirave politike, ekonomike dhe sociale sesa çdo sulm terrorist”, citohet të ketë thënë Ghebreyesus gjatë një konference për shtyp të martën.

Coronavirusi i ri, i quajtur zyrtarisht CoVID-19, ka infektuar 42.708 persona në Kinë dhe shkaktoi 1,017 vdekje.

Në nivel global, ka pasur edhe 393 raste shtesë, përfshirë një vdekje, dhe Ghebreyesus thotë se numri jo proporcional i rasteve në Kinë dhe në mbarë botën sinjalizoi se ekziston një “dritare mundësish”, ku një përgjigje e fortë mund të ketë një ndikim të rëndësishëm.

Kështu, Drejtori i Përgjithshëm kërkon nga vendet që ta “godisnin fort” përpara se të kishte një rritje të numrit të rasteve jashtë Kinës, gjë që ai pret të ndodhë më shpejt sesa më vonë.

Me gjithë “masat serioze” të Kinës për të parandaluar virusin në Wuhan, epiqendrën e shpërthimit dhe provincat e tjera, Ghebreyesus parashikoi se statusi aktual i rasteve të kufizuara ndërkombëtare nuk mund të “qëndronte i njëjtë për shumë kohë”.

“Ky është një armik i zakonshëm dhe ne duhet ta luftojmë atë duke përdorur mundësitë dhe ta luftojmë atë”, tha Ghebreyesus. “Ne nuk duhet ta humbim këtë mundësi. Nëse e humbasim, do të pendohemi”.

Virusi u identifikua te njerëzit në dhjetor dhe për shumë njerëz, simptomat, përfshirë kollën, ethet dhe gulçimi, ka qenë i butë.

Në raste serioze, veçanërisht ato që përfshijnë njerëz me sëmundje të frymëmarrjes ose sistem imuniteti të kompromentuar, virusi mund të shkaktojë pneumoni dhe të jetë fatal.

Nëse nuk ka një përgjigje të unifikuar për të “luftuar virusin në çdo cep”, drejtori i përgjithshëm tha se mund të ketë “raste më shumë dhe kosto shumë më të larta”.

Ai gjithashtu u ka bërë thirrje vendeve të “investojnë në përgatitje” duke u dhënë hua vendeve me sisteme të dobëta shëndetësore.

Investimi në përgjigjen e re ndaj coronavirusit mund të vijë me një çmim prej 675 milionë dollarësh dhe vite pune, por pa një investim të tillë, mund të përballemi me një “kërdi” në të gjitha fushat e shoqërisë, sipas drejtorit të përgjithshëm.

Para se të merrte postin e tij si drejtor i përgjithshëm i OBSH-së në vitin 2017, Ghebreyesus shërbeu në qeverinë e Etiopisë për më shumë se një dekadë si ministër i Shëndetësisë dhe më pas ministër i Punëve të Jashtme.

Duke u mbështetur në përvojën e tij si një zyrtar qeveritar që diskutoi për gatishmërinë ndaj terrorizmit, ai u tha gazetarëve se një virus mund të ketë pasoja më të fuqishme se “çdo veprim terrorist”.

“Kjo është arsyeja pse ne duhet të bëjmë gjithçka për të investuar në sistemet shëndetësore”, tha Ghebreyesus. “Kjo është arsyeja pse unë gjithmonë them se kjo është ajo që më zgjon natën dhe duhet të na zgjojë të gjithëve natën. Është armiku më i keq që mund ta imagjinoni”.

Ndryshe, zyrtarët kinezë filluan së pari kufizimin e udhëtimit brenda dhe jashtë Wuhan në 23 janar dhe më vonë zgjeruan bllokimet për të përfshirë disa zona të tjera të Provincës Hubei.

OBSH e përshëndeti Kinën për zbatimin e masës sepse ndihmoi në zvogëlimin e ndjeshëm të aftësisë së virusit për t’u përhapur. /Telegrafi/