Haradinaj, homazhe te shtatorja e heroit Zahir Pajaziti

Kryeministri i vendit, Ramush Haradinaj ka bërë homazhe te shtatorja e Zahir Pajazitit në 21 vjetorin e rënies së luftëtarëve të radhëve të para të Ushtrisë Çlirimtare të Kosovës, Zahir Pajaziti, Edmond Hoxha dhe Hakif Zejnullahu.

Haradinaj me këtë rast tha se po bën homazhe tek heronjtë e kombit dhe ndër themeluesit e UÇK.

Ai tha se në këtë ditë ka plot ngjarje dhe dëshmorët do t’i kujtojnë në mënyra të ndryshme.

“Duke shpreh respekt dhe duke u kujdes që nderi e lavdia të luftëtarëve të lirisë e sakrificës për liri të jetë çdoherë me ne… Lulet i ka vendos më i riu i familjes Pajaziti…Duam ta bëjmë kulturë në të ardhmen që shiritat kur i premë, ngjarjet që ndodhin mundësisht të mos i bëjmë ne po të rinjtë, fëmijët  e dëshmorëve”, tha Haradinaj.

Edhe  zyrtarë të komunës së Prishtinës kanë bërë homazhe te shtatorja e heroit Zahir Pajaziti.

Ndryshe, gjatë ditës në Podujevë do të mbahet ceremonia e zbulimit të shtatoreve të dëshmorëve Edmond Hoxha, Hakif Zejnullahu, Zahir Pajaziti dhe Ilir Konushevci.

Po ashtu në Bibliotekën Kombëtare “Pjetër Bogdani”, mbahet akademi përkujtimore.

Dëshmorët Zahir Pajaziti, Hakif Zejnullahu dhe Edmond Hoxha, kanë rënë heroikisht më 31 janar të vitit 1997 në Pestovë të Vushtrrisë, në një pritë të organizuar nga policia dhe njësitë tjera të armikut serb. /Telegrafi/