‘Hade 1 dhe 2’ shumë shpejt do të kenë banorët e rinj

Projektet e banimit social ‘Hade 1 dhe 2’, në Obiliq, shumë shpejt do të kenë banorët e rinj.

“Këto projekte tashmë janë të përfunduara dhe në proces është formimi i komisionit për përzgjedhjen e familjeve përfituese”, kështu tha ministri i Punës dhe Mirëqenies Sociale, Arban Abrashi pas takimit që pati sot me kryetarin e Komunës së Obiliqit, Xhafer Gashin.

Me këtë rast, kryetari Gashi, ka falënderuar ministrin Abrashi për bashkëpunimin ndërinstitucional, duke theksuar se ky projekt i financuar nga Ministria e Punës do të zgjidhë çështjen e banimit për shumë familje, të cilat që një kohë të gjatë po ballafaqohen me këto probleme.

Në takim u diskutua edhe për format e bashkëpunimit dhe implementimit të projekteve të përbashkëta në të mirë të qytetarëve të kësaj komune.

Ministri Abrashi tha se ministria që ai drejton do të vazhdojë edhe në të ardhmen me projekte të tjera, të cilat do të ndikojnë pozitivisht në rritjen e mirëqenies sociale të qytetarëve të Komunës së Obiliqit. /Telegrafi/