Guardiola bën një ankesë tejet të çuditshme pasi mposhti Man United në finale

Manchester City ka fituar sot (e shtunë) Superkupën e Anglisë ose siç njihet ndryshe Community Shield duke mposhtur në finale rivalin lokal Manchester United.

Ndeshja në kohë të rregullt përfundoi me rezultat të barabartë 1-1, andaj u desh ekzekutimi i penalltive për t’u vendosur fituesi.

Më të saktë nga pika e bardhë u treguan ‘Qytetarët’ që arritën të triumfojnë me rezultat të përgjithshëm 7-6.

Pas përfundimit të ndeshjes, Guardiola pati një ankesë të çuditshme në drejtim të kompanisë e cila prodhon topat.

“Është si një tullumbace (topi). Më vjen keq që ata vendosën të luajnë me këtë top, por nuk është i mirë”, ka thënë Guardiola.

Nervozizmi i teknikut katalanas u pa shpeshherë gjatë kësaj ndeshje, pasi ai në disa raste ishte i zhgënjyer me mënyrën se si futbollistët e tij po e humbnin topin.

Megjithatë, ky problem duket se nuk ekzistonte për lojtarët e Man Cityt, pasi ata u treguan mjaft të saktë nga 11 metra, duke konsideruar se shënuan shtatë nga tetë penalltitë që i ekzekutuan.

Bernardo Silva ishte i vetmi i cili dështoi të shënojë nga pika e bardhë, por megjithatë City e fitoi Superkupën e Anglisë në fund për herë të parë që nga viti 2019./Telegrafi/