GLPS paditë Ministrinë e Financave

Me autorizim nga organizatat e shoqërisë civile që e përbëjnë Iniciativën CorrWatch, Qendra për Raste Gjyqësore Strategjike sot ka dorëzuar në Gjykatën Themelore në Prishtinë padinë deklarative kundër Ministrisë së Financave, Punës dhe Transfereve (MFPT) lidhur me mohimin e të drejtës së monitorimit të procesit rekrutues për pozitën e Sekretarit të Përgjithshëm të kësaj Ministrie.

Në njoftimin e GLPS-së thuhet se nga provat që përmban kjo padi, konstatohet se Ministria e Financave ka zhvilluar fazat e rekrutimit për Sekretar të Përgjithshëm në MFPT sipas konkursit të shpallur më 6 gusht 2024, pa respektuar obligimin ligjor që fazat e rekrutimit të monitorohen nga shoqëria civile.

“Në vend se MFPT të ishte shembull që përmes rolit aktiv të saj t’i ftonte organizatat e shoqërisë civile në monitorimin e fazave të këtij procesi rekrutues, me qëllim të rritjes së transparencës dhe respektimit të obligimit ligjor që rrjedh nga Ligji për Zyrtarët Publik (LZP), ky institucion zgjodhi heshtjen dhe injorimin e kërkesave të vazhdueshme për monitorim të parashtruara nga Iniciativa CorrWatch.

Si Paditës, vlerësojmë që mohimi i të drejtës për monitorim të procesit rekrutues paraqet një shembull tipik se si institucionet e administratës publike, në procedurat rekrutuese për pozita të kategorisë së lartë drejtuese, nuk i zbatojnë në përpikëri rregullat dhe parimet e legjislacionit për shërbimin civil që është i aplikueshëm në Kosovë”, thuhet në njoftim.

GLPS tutje thekson se një shkelje e tillë nga MFPT-ja mund të krijoj praktika të tilla të paligjshme të cilat mund të ndiqen nga institucionet e tjera publike, me qëllim të shmangies së monitorimit nga shoqëria civile, duke cenuar kështu vet parimet mbi të cilat bazohet rekrutimi i zyrtarëve publik të përcaktuara në LZP.

Përmes kësaj padie, Gjykatës i është kërkuar që të deklaroj të drejtën që i njihet nga LZP-ja që në procedura të rekrutimit për pozita të kategorisë së lartë drejtuese në cilësinë e vëzhguesve mund të marrin pjesë përfaqësues nga shoqëria civile dhe sindikatat.

“Po ashtu, ta obligoj MFPT-në dhe të gjitha institucionet publike që të krijojnë kushte dhe ndërmarrin hapa të ligjshëm për të ofruar mundësi që në procedura të rekrutimit për pozita të kategorisë së lartë drejtuese në cilësinë e vëzhguesve të marrin pjesë përfaqësues nga shoqëria civile dhe sindikatat.

Qendra për Raste Gjyqësore Strategjike mbetet e përkushtuar që konkurset për pozita të kategorisë së lartë drejtuese të zhvillohen konform legjislacionit në fuqi, duke garantuar transparencë, meritokraci dhe llogaridhënie”, thuhet ndër të tjera në njoftim. /Telegrafi/