“Gjurmët e krimit të asaj nate ende janë të dukshme”, Kurti kujton fëmijët e familjes Bala të vrarë në Dardani të Pejës

Në përvjetorin e 25-të të çlirimit të Kosovës, kryeministri Albin Kurti ka vizituar familjen Bala në Dardani të Pejës, të cilës natën e 12 qershorit 1999 pesë fëmijë iu vranë mizorisht nga forcat serbe.

Në një postim në Facebook, Kurti përshkroi me dhimbje sesi në errësirën e natës, forcat serbe hynë me dhunë në dhomat ku po flinin fëmijët dhe mblodhën të gjithë anëtarët e familjes Bala në një dhomë.

“Motrat Nita dhe Rina, vetëm 5 dhe 6 vjeç, u vranë bashkë me nënën e tyre Vjollcën, 28 vjeç. Vëllai i vogël Rroni, 4 vjeç, i cili u fsheh pas nënës së tij, mbijetoi vetëm pasi ishte alivanosur gjatë të shtënave dhe më pas u fsheh nën këmbët e gjyshes së tij të paralizuar, Mahije. Të atin, Musën (31 vjeç) e kishin rrëmbyer me dhunë. Pesë ditë më vonë, më 17 qershor 1999, ai u gjetë i vrarë, i gjymtuar nga torturat”, ka shkruar Kurti.

Kryeministri përkujtoi edhe viktimat e tjera të asaj nate tragjike: Agoni, 6 vjeç, Dardanja, 11 vjeç, dhe Hajriu, 12 vjeç.

“Nëna e tyre, Halisja, mbijetoi pavarësisht se u qëllua me nëntë plumba, ashtu si dhe Isa me të birin e tij Vetonin, 8 vjeç. Tragjikisht, babai i tyre Musa, 31 vjeç, u rrëmbye me dhunë dhe u gjet i vrarë pesë ditë më vonë, më 17 qershor 1999, i gjymtuar nga torturat”, ka shkruar Kurti.

Kurti theksoi se askush nuk është dënuar apo gjykuar për këtë masakër, dhe se gjurmët e krimit ende janë të dukshme në dhomën e ditës së familjes Bala. Ai bëri thirrje për drejtësi për të gjitha familjet që kanë humbur të dashurit e tyre gjatë luftës në Kosovë.

“Plagët e hapura të familjes Bala dhe të gjitha familjeve që kanë humbur të dashurit e tyre kërkojnë drejtësi. Këto krime nuk mund të mbeten të pandëshkuara. Nuk mund të harrohen vuajtjet e qëndresa e popullit. Shumë gjak është derdhur e shumë jetë janë dhënë për lirinë që e gëzojmë sot,” shkroi Kurti.

Kryeministri përmendi gjithashtu se brezat e rinj tani rriten të lirë falë sakrificës së të parëve të tyre. Ai kujtoi se vajza e Vetonit, njërit prej të mbijetuarve, mban emrin e hallës së saj të vrarë, Dardane.

“Falë kësaj sakrifice, brezat tani rriten të lirë. Po rriten me lirinë edhe tre fëmijët e Vetonit. Vajza mban emrin e hallës së vrarë, Dardane. I përjetshëm qoftë kujtimi për të gjithë martirët e dëshmorët që u flijuan për liri! Lavdi!” përfundoi Kurti. /Telegrafi/