Gjoshi i PDK-së: Gabim je Kryeministër, në Hagë po gjykohet shteti i Kosovës

Anëtari i Kryesisë së Partisë Demokratike të Kosovës, Betim Gjoshi ka reaguar ndaj deklaratës së kryeministrit të Kosovës, Albin Kurti,  i cili sot tha se nuk mund të kërkojë nga një shtet i tretë garanci për mbrojtjen në liri të ish krerëve të UÇK-së që po mbahen në paraburgim në Hagë, pasi atje, sipas Kurtit, nuk po gjykohet shteti i Kosovës.

Gjoshi, përmes një postimi në Facebook, tha se kryeministri është gabim, sepse “në Hagë po gjykohet pikërisht shteti i Kosovës”.

“Përmes kësaj deklarate, ti kryeministër po ik nga obligimi shtetëror për të mbrojtur luftën e popullit tënd për liri dhe pavarësi”, ka shkruar Gjoshi.

Postimi i plotë i Gjoshit:

“Jo kryeministër, ti je gabim!

Në Hagë po gjykohet pikërisht shteti i Kosovës.

Në Hagë po gjykohet lufta e drejtë për lirinë e Kosovës.

Në Hagë po gjykohet e drejta e shqiptarëve të Kosovës për shtet të pavarur.

Në Hagë po gjykohet edhe ndihma e botës demokratike për të ndaluar Serbinë gjenocidale.

Përmes kësaj deklarate, ti kryeministër po ik nga obligimi shtetëror për të mbrojtur luftën e popullit tënd për liri dhe pavarësi.

Ti po ik nga mbrojtja e themeluesve të shtetit të Kosovës sepse edhe ti e din se pa UÇK-në askush prej nesh nuk do të jetonte sot në Republikën e Kosovës, por me shumë gjasë do të ishte akoma refugjatë në ndonjë shtet të rajonit ose më larg.

Mos e luaj qëllimisht të paditurin.

Braktise betejën që ke nisur me Vjosa Osmanin & Co kundër shtetit të Kosovës dhe kundër UÇK-së”, ka shkruar Gjoshi.

Kryeministri i Kosovës, Albin Kurti, në konferencën për shtyp pas mbledhjes së Qeverisë ku është miratuar programi qeverisës, ka folur edhe lidhur me mundësinë e garantimit të lirimit me kusht të krerëve të UÇK-së, të akuzuar nga Gjykata Speciale e që po mbahen në paraburgim në Hagë.

Lexo po ashtu Kurti: Shteti nuk është në gjyq, nuk mund të kërkoj nga Kroacia garanci për të akuzuarit nga Specialja

Kryeministri Kurti ka thënë se Kosova nuk është shtet i tretë, prandaj nuk mund ta bëjë një gjë të tillë.

“Nuk mund të kërkoj unë nga Kroacia për garanci. Aty ka një proces juridik, në të cilin ata që janë në burg i kanë mbrojtësit e tyre ligjorë, të cilët e udhëheqin mbrojtjen. Pra nuk është shteti në gjyq. Andaj nuk më takon mua të marrë këso hapash. Do të ishte gabim edhe për shtetin e Kosovës dhe për vetë luftëtarët e UÇK-së që i kemi në burg”, ka thënë Kurti. /Telegrafi/