Gjini ngushëllon familjen Pitaqi nga Gjakova pas vdekjes së gruas shtatzënë

Kryetari i komunës së Gjakovës, Ardian Gjini ka ngushëlluar familjen Pitaqi nga Gjakova pas vdekjes së familjares së tyre nga coronavirusi, gruas 40 vjeçare, shtatzënë.

Gjini përmes një postimi në rrjetin social Facebook shkruan se ka udhëzuar Drejtorinë për Shëndetësi dhe Mirëqenie Sociale që t’i gjendet afër familjes me gjithçka që kanë nevojë dhe me të gjitha mundësitë që i ka komuna.

“Me pikëllim të thellë mora lajmin për vdekjen e bashkëqytetares sonë Valentina Pitaqi. Në këto momente të vështira për familjen, unë dhe të gjithë qytetarët e komunës i shprehim ngushëllimet më të sinqerta familjes Pitaqi. Unë sot i jam drejtuar me një letër familjes Pitaqi, dhe e kam udhëzuar Drejtorinë për Shëndetësi dhe Mirëqenie Sociale që t’i gjendet afër familjes me gjithçka që kanë nevojë dhe me të gjitha mundësitë që i ka komuna”, shkruan Gjini.

Ndryshe, sot në orët e hershme të mëngjesit ka ndërruar jetë Valentina Pitaqi nga Gjakovë, e cila ishte shtatzënë në javën e 28.

Lexo po ashtu Vdes gruaja shtatzënë me COVID-19

Ajo po trajtohej në mjekimin intensiv të Klinikës Infektive që prej datës 15 prill 2020.

Deri tani të infektuar me coronavirus janë identifikuar 598 raste, 16 viktima dhe 123 të shëruar. /Telegrafi/