Lajme Kosovë Politikë

Gjini: Haradinaj është kidnapuar politikisht, Demarkacioni nuk kalon

Para 8 vitesh

Aleanca për Ardhmërinë e Kosovës sot mblodhi Këshillin Drejtues në një takim të jashtëzakonshëm, ku u diskutua rreth mbajtjes së liderit të partisë, Ramush Haradinajt në Francë dhe çështja e Demarkacionit.

Në një konferencë për media pas mbledhjes, nënkryetari i AAK-së, Ardian Gjini, tha se Këshilli Drejtues shpreh shqetësimin e tij për ndaljen apo kidnapimin politik të kryetarit Ramush Haradinaj.

Gjini tha se ndalimi i Haradinajt është më shumë kidnapim politik, sesa proces gjyqësor.

Në emër të Këshillit Drejtues të AAK-së, Gjini kërkoi që organet organet franceze të mos i nënshtrohen fletarresteve të Serbisë.

Gjithashtu, ai tha se Këshilli Drejtues i bën thirrje autoriteteve kosovare që të reagojnë lidhur me këtë rast, por jo siç kanë bërë deri më sot.

Sipas tij, ky proces nuk ka të bëjë me individin por ka të bëjë me Kosovën.

Sa i përket demarkacionit, Gjini tha se ne rikonfirmojmë se është i gabueshëm raporti i nxjerr nga komisionet qeveritare për shënjimin e vijës kufitare të Kosovës me Malin e Zi, nga aty vetëm Kosova humb territor.

“Ky version duhet të bie në Kuvend dhe të mos kalojë”, tha Gjini

Ai tha se kërkojmë që të rrezohet ky version i demarkacionit dhe të rinegociohet edhe njëherë me Malin e Zi.

Përndryshe ai tha se AAK është e gatshme të pranojë vendimin e Arbitrazhit ndërkombëtar

Ndyshe AAK, nga mbledhja e sotme e Këshillit Drejtues ka dalë me një deklaratë, raporton Telegrafi.

Deklarata e plotë:

Ndaljen e mëtejshme të Kryetarit Ramush Haradinaj në Francë, tash e tutje e konsiderojmë kidnapim të pastër politik.

Kryetari Haradinaj është ndaluar në Francë pas ndërhyrjes së Serbisë dhe në bashkëpunim me kundërshtarët e Kosovës.

Mbajtja e tij tash e dy muaj, nuk ka asnjë lidhje as me drejtësinë as me të shkuaren e Haradinajt, por me qendrimet e tij parimore në raport me zhvillimet në Kosovë dhe për Kosovën.

Iu bëjmë me dije të gjithëve se Ramush Haradinaj nuk është vetëm dhe zvarritja e lirimit të tij, mund të prodhojë pasoja të rënda për paqen dhe stabilitetin.

Kjo farsë gjyqësore me Haradinajn duhet të marrë fund menjëherë. Kërkojmë nga autoritet franceze që të mos vihen në shërbim të Serbisë, e cila është kthyer në mendësinë e vjeter dhe po don që sërish të shkaktojë trazira në Ballkan.

Autoritetet e Kosovës ndërkaq, duhet që me urgjence të vihen në levizje, sepse ndalja e Haradinajt nuk ka të bëjë me individin por është sulm ordiner mbi të tashmen dhe të ardhmen e Kosovës.

AAK dhe shqiptarët, nuk do të qetësohen përderisa ai të mos i kthehet vendit të tij dhe punëve që e presin në Kosovë.

Kosova ka nevojë për Ramush Haradinajn dhe prandaj askush nuk ka të drejtë që ta pengojë atë që të punojë për vendin e tij. Nëse institucionet e Kosovës do të rezultojnë të pafuqishme në veprim, atëherë fatet e kësaj çështjeje do t’i marrë në dorë populli.

Kosova ka dhënë boll për stabilitetin rajonal dhe nuk mund të japë më.

Ndërsa për Demarkacionin AAK deklaron si në vijim:

Ky version i demarkacionit është në kundërshtim me interesin nacional të Kosoves.

Ai parasheh që Kosovës t’i merren disa mijëra hektarë tokë, prandaj është i papranueshem.

Kalkulimet se ky version i demrakacionit është kusht për vizat, është një kushtëzim i pandershëm që është sajuar nga udhëheqja shtetërore e Kosovës.

Nuk mund të pranohet asnjë kushtëzim në dëm të territorit të vendit. Askush nuk ka të drejtë të bëj pazar me territorin, pavarësisht pasojave.

Deputetët dhe udhëheqja shtetërore do të mbajnë përgjegjësi politike, morale e historike nëse nuk do ta kuptojnë se nuk kanë as fuqi, as mandat që ta tjetërsojnë territorin e vendit.

Çmimi i kalimit eventual të këtij versioni mund të jetë shumë më i lartë se sa kundërshtimi i tij.

Kosova nuk ka pse të jetë rast i ndryshëm nga shtetet tjera që kanë pasur konteste me kufijtë e tyre.

Demarkacioni duhet të mos votohet dhe kjo çështje të shkoj në rinegocim me Malin e Zi, duke mos përjashtuar edhe arbitrazhin ndërkombëtar si zgjidhje.