Gjesti i madh i Sharapovas, kompania e saj për tre muaj do t’i dhurojë përfitimet për të prekurit nga uragani në Porto Riko (Foto)

Maria Sharapova është zotuar se do t’i dhurojë të gjitha përfitimet e kompanisë së saj, “Sugarpova”, në tre muajt e ardhshëm për t’i ndihmuar të prekurit nga uragani Maria në Porto Riko.

Tenistja e famshme ruse ka bërë të ditur se kompania e saj e prodhimit të sheqerkave dhe çokollatave do t’ia dhurojë paratë fondacionit të medalistes olimpike të tenisit, Monica Puig.

Kampionia e pesëfishtë ‘Grand Slam’ dhe Puig zhvilluan një ndeshje miqësore në kryeqytetin e Porto Rikos, San Juan, në dhjetorin e kaluar, kur rusja ishte suspenduar për 15 muaj pasi rezultoi pozitive në doping gjatë Australian Open.

Lexo po ashtu Sa të gjatë janë yjet e Hollywoodit, dhe me kë nga kolegët kanë të njëjtën gjatësi? (Foto)

24-vjeçarja Puig, e cila i befasoi të gjithë kur u bë medalistja e parë e artë olimpike nga Porto Riko kur e mposhti Angelique Kerberin në ‘Rio 2016’, është angazhuar shumë për t’i ndihmuar bashkëkombësit e saj pas katastrofës natyrore.

“Nga largësia, është e tmerrshme të shohësh se sa po vuan ishulli dhe njerëzit”, ka shkruar Sharapova në Facebook.

Nga uragani humbën jetën 16 njerëz në Porto Riko dhe qindra mijëra të tjerë mbetën pa energji elektrike, pa kulm mbi kokë, pa ujë dhe gjësende ushqimore.

Shumë yje të njohura nga bota e ekranit, muzikës dhe sportit, kanë nxitur iniciativa të ndryshme për t’i ndihmuar banorët e prekur nga uragani shkatërrues. /Telegrafi/