Gjermania e interesuar për specialistë nga Ballkani

Ballkani Perëndimor është një nga prioritetet e Agjencisë Gjermane për Ndërmjetësim dhe Punësim (ZAV).

Ajo që në pamjen e parë duket si call center është qendra virtuale e mirëseardhjes e Agjencisë Federale për Ndërmjetësim dhe Punësim (ZAV) në Bonn. Punonjësit ofrojnë këshillime për vende pune në anglisht dhe gjermanisht, por edhe në rumanisht, shqip apo në gjuhë të tjera. “Jam serbe, jam infermiere e diplomuar. Di gjermanisht por nuk kam dëshmi për këtë.” Apo “Unë jam marokan dhe dua të punoj si shofer kamioni në Gjermani. A njihet patenta ime dhe përvoja?” Këtë vit punonjësit e kësaj qendre kanë marrë rreth 175.000 telefonata të tilla dhe të ngjashme nga njerëz që kërkojnë punë në Gjermani. Këtyre u shtohen edhe 32.200 kërkesa me e-mail dhe 4.000 me mesazhe në chat.

Gjermani kërkon specialistë brenda BE-së dhe jashtë saj. Ndër rajonet e preferuara është Ballkani Perëndimor, Afrika e Veriut dhe vende si Meksika. Nevojë ka për inxhinierë, por edhe ekspertë kompjuterësh, sqaron Carsten Klein, drejtor i ZAV-it. Po ashtu ka nevojë për infermierë dhe profesione të tjera mjekësore, por edhe për profesione që kërkohen në zona të caktuara si speditor apo shofer kamionësh.

Krahas aftësive profesionale kërkohen edhe njohuri të gjermanishtes. Por niveli i njohurive varet nga profesioni. Për sektorin e IT-së është vendimtar niveli i anglishtes, por në fushën e infermierisë dhe të hotelerisë niveli i gjermanishtes, sepse aty ke të bësh direkt me klientë.

ZAV punon intensivisht me partnerë në vende të ndryshme dhe për momentin po punon me vendet e Ballkanit Perëndimor. Për këtë së fundi ishin në Bonn punonjës së zyrave të punës nga vende të ndryshme të Ballkanit për të mësuar për procedurën e ndërmjetësimit të vendeve të punës. /Telegrafi/