Shëndetësi Të tjera

Gjashtë shenja dhe simptoma që tregojnë për probleme të zorrëve

(Foto: Pexels)

Para 1 viti

Sistemi tretës është një sistem tepër kompleks i përbërë nga mikroorganizma të shumtë. Ndaj është e rëndësishme t’u kushtoni vëmendje simptomave të zorrëve jo të shëndetshme, për të reaguar në kohë dhe për ta zgjidhur sa më shpejt problemin shëndetësor.

Edhe pse disa prej këtyre mikroorganizmave janë të dëmshëm, shumica e tyre janë të dobishëm për shëndetin e njeriut. Ka rreth 500 lloje të ndryshme të tyre, dhe ato ndikojnë drejtpërdrejt në disponimin, sistemin imunitar dhe shëndetin mendor. Madje ekziston një lidhje mes tyre dhe sëmundjeve të lëkurës, kancerit dhe çrregullimeve autoimune.

Shqetësime të lukthit

Mosfunksionimi i baktereve të zorrëve quhet disbiozë dhe mund të shkaktojë tretje jo të rregullt ose eliminim të ushqimit. Disbioza mund të shkaktojë kapsllëk, parehati, ënjtje të barkut, gazra dhe fryrje. Gazrat dhe ndjenja e fryrjes janë një tregues se nuk prodhohet mjaftueshëm acid në stomak, kështu që ushqimi fermentohet në lukth. Për disa njerëz, disbioza mund të çojë në zhvillimin e sindromës së zorrës së irrituar (IBS) ose kancerit të zorrës së trashë.

Intoleranca në ushqim

Disbioza mund të shkaktojë gjithashtu alergji ushqimore dhe intolerancë ushqimore. Këto janë të ndryshme nga helmimi me ushqim, ku nivelet e larta të baktereve ose viruseve në ushqim bëjnë që trupi të nxjerrë jashtë ushqimin e rrezikshëm. Me një alergji ushqimore, një person shfaq të gjitha llojet e reagimeve kur konsumon një lloj të caktuar ushqimi. Nga ana tjetër, me intolerancën ushqimore, trupi i njeriut nuk është në gjendje t’i tretë siç duhet disa ushqime, gjë që shkakton gjendjet e përmendura më parë, si gazrat, kapsllëkun, fryrjen e barkut dhe të ngjashme.

Dëshira për sheqer

Bakteret e zorrëve sekretojnë proteina që janë të ngjashme në natyrë me leptinën dhe grelinën, të cilat janë hormone që rregullojnë urinë. Këto baktere ndikojnë në disponimin dhe oreksin. Pra, nëse vazhdimisht hani ushqim të shëndetshëm, ju ushqeni bakteret e mira që zhvillohen mbi to, kështu që me kalimin e kohës jeni gjithnjë e më shumë të prirë për të ngrënë ushqim të shëndetshëm.

Ndryshime të papritura në peshë, erë e keqe e gojës, mungesë vitaminash

Bakteret e zorrëve ndikojnë në mënyrën se si lëndët ushqyese nga ushqimi përthithen, sheqeri absorbohet dhe ruhet yndyra. Këta tri parametra kanë një lidhje të drejtpërdrejtë me peshën. Nëse një person po humb peshë pa arsye, ai mund të vuajë nga një gjendje e quajtur rritje e tepërt e baktereve në zorrët e holla (SIBO).

Era e keqe e gojës shkaktohet nga bakteret që gjenden në mishrat e dhëmbëve, midis dhëmbëve dhe gjuhës. Megjithatë, ndryshimet në bakteret e zorrëve mund të tregojnë sëmundje të veshkave dhe diabet të kontrolluar keq, të cilat po ashtu shkaktojnë erën e keqe të gojës.

Pavarësisht një diete të shëndetshme, disa njerëz shfaqin mungesë të vitaminave dhe arsyeja për këtë është një çekuilibër në bakteret e zorrëve. Bakteret e zorrëve janë fajtore për mungesën e magnezit, vitaminave B7, B12, D dhe K.

Alergjitë

Zorrët e dëmtuara të shkaktuara nga një dietë jo e shëndetshme mund të shkaktojnë alergji ushqimore dhe humbje të proteinave. Kjo mund të shkaktojë sëmundje të lëkurës, si ekzema, rozacea, akne, skuqje dhe psoriazë. Një përmbledhje kërkimore e botuar në revistën Frontiers in Microbiology zbuloi se bakteret e zorrëve të çekuilibruara mund t’i shkaktojnë të tria llojet e alergjive: alergjitë e lëkurës, alergjitë ushqimore dhe alergjitë e frymëmarrjes.

Gjendjet autoimune

Një zorrë e shëndetshme është thelbësore për një imunitet të mirë, sepse pothuajse 70 për qind e sistemit imunitar ndodhet në zorrë. Kur zorra është jashtë ekuilibrit, ajo shkakton një sërë gjendjesh të tilla si inflamacion dhe çrregullime autoimune.

Disa nga bakteret e zorrëve prodhojnë toksina që shkaktojnë inflamacion dhe nxitin disa nga gjendjet e listuara më sipër, si ndjeshmëria ndaj insulinës, ekzema, dhimbje barku, kapsllëk, sindroma e zorrës së irrituar dhe migrenë. /Telegrafi/