Gashi thotë se ministri Bytyqi kurrë nuk ka folur për mbylljen e ndonjë universiteti

Ministri i Arsimit, Shyqiri Bytyqi, ditë më parë kishte bërë të ditur për Radio Kosovën, se është formuar një grupi punues nga MASHT-i, për profilizimin e universiteteve publike në vend.

Madje ky grup punues, ka nxjerrë një raport ku edhe ia ka dorëzuar Qeverisë dhe Komisionit Parlamentar për Arsim.

“Në këtë raport janë dhënë dy rekomandime, i pari ka të bëjë me atë që mund të reduktohen universitetet në dy publike dhe të mbesin kampuse pjesë të tjera që sot aktualisht janë universitete, me qëllimin e vetëm që të jetë cilësia në nivel më të lartë. Mos të bëhen konkurrentë të programeve që nuk janë kërkesë e tregut të punës. E dyta ka të bëjë me profilizimin e tyre, që secilit universitet iu kanë përzgjedhur profilet e nevojshme dhe që janë kërkesë e tregut të punës”,kishte thënë ministri Bytyqi.

Por Valmir Gashi, këshilltar i Ministrit të Arsimit Shyqiri Bytyqi, përmes një shkrimi në Facebook, ka thënë se deklarata e ministrit Bytyqi lidhur me reduktimin e universiteteve është interpretuar në mënyrë jo të drejt.

Lexo po ashtu MASHT propozon reduktimin e numrit të universiteteve publike

Ai thotë se, ministri Bytyqi në asnjë moment nuk është deklaruar për mbylljen e asnjë universiteti në Kosovë.

“Me qëllim të një sqarimi sa më të mirë për opinionin, lidhur me raportin për qëndrueshmërinë e universiteteve publike, një temë e mbyllur tashmë, mirëpo që vazhdon kohë pas kohe të riaktualizohet për arsye të cilat nuk i kemi të qarta, madje edhe duke u interpretuar në mënyrë jo të drejtë, është mirë të kuptohet se: Ministri Bytyqi në asnjë moment nuk është deklaruar për mbylljen e asnjë universiteti në Kosovë”, ka shkruar Gashi.

Sipas tij,  raporti për të cilin po flitet ka gati një vit që është mbyllur nga ana e Ministrisë, dhe se i njëjti është bërë nga ekspertë për nevoja të brendshme, ndërsa veprimet tjera janë përtej politikave të Ministrisë.

“Ministri Bytyqi ka qenë dhe mbetet i përkushtuar të ndihmojë në zhvillimin dhe qëndrueshmërinë e të gjitha institucioneve të arsimit të lartë publik dhe privat”, ka shkruar Gashi./Telegrafi/