Fortnite nuk është më e disponueshme në Kinë për shkak të rregullave strikte

Lojtarët kinezë nuk mund të shijojnë më lojën e njohur Fortnite, u konfirmua këtë javë.

Fortnite nuk është i disponueshëm për kinezët që nga e hëna pasi u tërhoq nga ky treg pas një periudhe prove dhe arsye janë rregullat strikte të Kinës në lidhje me sektorin e lojërave dhe teknologjisë.

Në fillim të këtij muaji, zhvilluesi Epic Games njoftoi se do të mbyllte serverët e tij Fortnite për shkak të sfidave të paraqitura nga kufizimet strikte të qeverisë kineze në sektorët e lojërave dhe teknologjisë.

Kështu që nga e hëna kinezët nuk kanë akses në Fortnite, siç tregojnë postimet në rrjetet sociale.

Testimi beta i Fornite në Kinë filloi në vitin 2018, por loja nuk mori kurrë miratimin zyrtar të qeverisë, gjë që e bëri të vështirë për Epic Games të fitonte para nga përmbajtja e lojës.

Kina filloi një përballje me industrinë e lojërave disa vite më parë dhe po kërkon të bllokojë përmbajtjen që konsideron se përshkruan dhunën e tepruar.

Kjo situatë e detyroi Tencent të ofronte një version jo të dhunshëm të lojës mega-popullore PUBG në Kinë.

Përveç “promovimit të dhunës”, Kina gjithashtu dëshiron të reduktojë kohën që të miturit kalojnë duke luajtur lojëra.

Kohët e fundit, koha e lejuar për lojërat në internet për moshat nën 18 vjeç është reduktuar në një orë, ose midis orës 20:00 dhe 21:00 të premteve, fundjavave dhe festave.

Media shtetërore në Kinë vlerësoi më parë se rreth 82.5 për qind e të miturve në Kinë luajnë lojëra rregullisht në internet dhe se 13.2 për qind e asaj grupmoshe luajnë lojëra celulare më shumë se dy orë në ditë gjatë javës. /Telegrafi/