Filmi i ri për James Bondin do të xhirohet edhe në Kroaci

Vazhdimi i ri i filmit për James Bondin do të fillojë të xhirohet kah fundi i këtij viti, ndërsa xhirimet do të bëhen edhe në Kroaci.

Sipas njoftimit të Mirror, Daniel Craig mund të shfaqet në Dubrovnik duke luftuar kundër protagonistëve negativë.

“Shatterhand” është filmi i 25-të me radhë për agjentin 007. Edhe pse Craig para dy vitesh kishte deklaruar se nuk do ta luante më agjentin sekret, megjithatë ai duket se do të vazhdojë me rolin ikonik.

Lexo po ashtu Megjithatë, Daniel Craig për herë të pestë James Bond

Kjo nuk do të jetë hera e parë që një film për Bondin xhirohet në Kroaci. Në vitin 1963, filmi “From Russia With Love” është xhiruar në Zagreb dhe në Beograd, kur Bondin e luante Sean Connery.

Producentët Michael G. Wilson dhe Barbara Broccoli kanë thënë se presin që “Shatterhand” të jetë një vazhdim i shkëlqyer i “Spectre”.

Atyre nuk u ka pëlqyer fakti që kryetari i Dubrovnikut e ka bërë publik lajmin se ata po kërkojnë leje për të xhiruar në këtë qytet.

Siç është edhe traditë, filmi i ri për agjentin sekret pritet të shfaqet për herë të parë në Britani të Madhe në nëntor të vitit 2019, pastaj do të vazhdojë në kinematë amerikane dhe në të gjithë botën. /Telegrafi/