Lajme Kosovë Komunat

Pelegrinët serbë nuk shkojnë në Gjakovë, shpërndahen protestuesit (Video)

Para 7 vitesh

Pelegrinët serbë nuk kanë shkuar në Gjakovë për të vizituar Kishën Ortodokse.

Qytetarët që kanë protestuar kundër ardhjes së pelegrinëve serbë në Gjakovë pasi kanë kuptuar se pelegrinët serbë nuk do të jenë në Gjakovë kanë filluar të shpërndahen.

Ndryshe, edhe komandanti i Policisë për rajonin e Gjakovës, Kris Gjoka ka thënë se nuk kanë marrë njoftim zyrtar se pelegrinët serbë do të vizitojnë kishën ortodokse serbe.

Mbahet protestë kundër pelegrinëve serbë në Gjakovë

E plotësuar: Po vazhdon të mbahet protesta e qytetarëve të Gjakovës, të cilët po kundërshtojnë ardhjen e pelegrinëve serbë në Gjakovë për të vizituar kishën.

Qytetarët gjakovarë kanë bllokuar hyrjet me vetura për në kishë, në mënyrë që të mos lejojnë pelegrinët serbë të realizojnë vizitën. Protesta e tyre ka filluar që nga ora 08:00.

Ndërkaq, Policia e Kosovës nuk po i lejon protestuesit të jenë afër hyrjes së kishës. Policia po ashtu po tenton t’i largojë veturat e parkuara me qëllim të lirimit të hyrjes në kishë.

E plotësuar:

Komandanti i Policisë së Kosovës për rajonin e Gjakovës, Kris Gjoka ka thënë se nuk kanë paralajmërim zyrtar se pelegrinët serbë do të vizitojnë kishën ortodokse serbe në Gjakovë.

“Deri më tani nuk kemi informatë zyrtare që do të vizitohet nga pelegrinët serbë”, tha Gjoka.

Ai tha se deri tani janë duke menaxhuar mirë me situatën dhe siç tha ai po ofrojnë rend dhe ligj.

Gjoka bëri të ditur se në pjesën tjetër të hyrjes për në kishë, janë arrestuar tre protestues për mos bindje të urdhrave të Policisë.

E plotësuar: Njëra nga nënat gjakovare e cila po merr pjesë në këtë protestë fajësoi presidentin Thaçi dhe të gjithë krerët e tjerë institucional për atë se çfarë po përjeton ajo së bashku me të gjitha nënat e tjera.

“Pelegrinët serbë nuk kanë vend në qytetin tonë. Gabimet që është duke i bërë presidenti Thaçi janë të pafalshme dhe historia do t’i gjykojë. Çfarë me ju thanë unë katër jetimëve që i kam në shtëpi”, u shpreh nëna gjakovare.

Ajo shtoi se të gjithë pushtetarët duhet të ikin nga ky vend, duke theksuar se “kurrë këmbë e shkaut nuk ka me shkel në Gjakovë”. /

E plotësuar: Policia para pak minutash ka arrestuar një qytetar. Të arrestuarin, policia fillimisht e ka futur në njërën prej veturave pastaj e ka transportuar në veturën tjetër të policisë.

E plotësuar: Anëtarja e Komisionit qeveritar për të pagjeturit, Nesrete Kumnova është alivanosur sot gjatë protestës kundër ardhjes së pelegrinëve serb në Gjakovë.

Ajo është alivanosur gjatë fjalimit.

Fillon protesta kundër pelegrinëve serbë në Gjakovë

Ka filluar të mbahet protesta në Gjakovë kundër ardhjes së paralajmëruar të pelegrinëve serbë.

Protesta kundër pelegrinëve serbë është thirrur nga qytetarët e Gjakovës.

Qytetarët në protestë po mbajnë parullat “S’ka qetësi pa drejtësi” dhe “Gjaku i fëmijëve shqiptarë të vrarë nga Serbia nuk falet”.

Ndryshe, një ditë më parë themeluesja e Fondit për të Drejtën Humanitare, Natasha Kandiq, e ka ftuar presidentin e Kosovës, Hashim Thaçi, që sivjet t’ua mundësojë serbëve të Gjakovës ta vizitojnë kishën.

Ndërsa, në përgjigjen e tij, presidenti Thaçi ka thënë se do të angazhohet për liri dhe siguri të lëvizjes për të gjithë qytetarët e Kosovës, përfshirë edhe komunitetin serb, kudo në Kosovë.

“Edhe në ditët më të vështira, qytetarët tanë kanë ruajtur objektet fetare, monumentet historike dhe trashëgiminë ortodokse të Kosovës. Ne vazhdojmë ta njohim kontributin e zonjës Kandiq dhe i shprehim mirënjohje të thellë për aktivitetin e saj para, gjatë dhe pas luftës. Sot, është e paimagjinueshme dhe është e papranueshme që dikush të cenojë të drejtat apo të mos lejojë vizitën e qytetarëve serbë në objektet fetare, qoftë në Gjakovë ose kudo tjetër anembanë Kosovës”, ka shkruar Thaçi në Facebook.