Fillon keqpërdorimi i ujit të pijes, paralajmërohen inspektime

Me të hyrë në sezonin e verës dhe me ngritjen e temperaturave, kanë filluar të rriten dukshëm edhe kërkesat për ujë të pijshëm. Kompania e Ujësjellësit Rajonal ”Prishtina”, u ka bërë apel të gjithë konsumatorëve në zonën e shërbimit, Prishtinë, Fushë Kosovë, Obiliq, Drenas, Shtime, Lipjan, Graçanicë dhe Podujevë me të gjitha fshatrat përreth, që ujin e pijshëm ta shfrytëzojnë sa më racionalisht në këtë periudhë, ta shfrytëzojnë për pije dhe higjienë dhe assesi për destinime tjera që konsiderohen të paarsyeshme.

KUR ”Prishtina” nëpërmjet një komunikate thotë se deri tash, me të gjitha mundësitë teknike të sistemit operativ ka mbajtur një furnizim shumë të mirë me ujë të pijshëm, ku për një kohë tejet të gjatë kishte eliminuar tërësisht reduktimet e ujit gjatë gjithë ditës në secilën zonë menaxhuese.

“Uji, që nga dita e djeshme ka filluar të keqpërdorët dhe më së miri këtë dukuri e tregojnë rezervuarët në kryeqytet , ku rënia e nivelit të ujit është drastike. Ujësjellësi Rajonal ‘Prishtina’ bashkë me Inspekcionin e Kuvendit Komunal të Prishtinës duke filluar nga ditët në vijim, do të dalin në teren për të kontrolluar shpenzimin e ujit dhe keqpërdorimet që po bëhen nga persona të pandërgjegjshëm. Nëse vazhdohet me këtë tempo të shpenzimit enorm të ujit të pijshëm, jemi të detyruar që të fillojmë të aplikojmë reduktime. Shpenzimi racional i ujit të pijshëm n ë këtë periudhë është i domosdoshëm. Uji sot nuk duhet të shfrytëzohet në mënyrë të pakontrolluar, me ç’rast mund t’i zvogëlojmë rezervat e ujit të pijshëm, por ai duhet kursyer pikë për pikë”, thuhet në komunikatë.

Roli i ujit është thelbësor për qeniet e gjalla dhe planetin, ai na nevojitet për pije, shtëpi dhe kopshte, por me rëndësi është ta kuptojmë domethënien e përdorimit jo të drejtpërdrejt të ujit si për prodhim, furnizim dhe zhvillim. /Telegrafi/