Fillimi i mësimit në shtator, Likaj prezanton tre skenarët

Në komisionin për Arsim, Shkencë, Teknologji, Inovacion, Kulturё, Rini dhe Sport po merr pjesë edhe ministri i Arsimit, Ramë Likaj për të diskutuar rreth skenarëve për fillimin e vitit të ri shkollor 2020-2021.

Likaj ka njoftuar anëtarët e komisionit për tri skenarët për fillimin e mësimit me 1 shtator.

Kthimi në shkolla duke respektuar masat, mësimi i kombinuar në shkolla dhe online si dhe mësimi online përmes platformës e-mësimi, janë tre skenarët që prezantoi ministri Likaj.

Sipas tij, skenari duke respektuar masat e rekomanduar nga IKSHPK, janë më të preferuarat, ndërkaq ka shtuar se mësimi në distancë tha se do të mbahet në ndonjë shkollë e cila ka të infektuar.

Sipas tij, deri tani janë mbledhur 1,1 milionë euro donacione, për mjetet mbrojtëse. Likaj gjatë raportimit në komisionin për Arsim, Shkencë, Teknologji, Inovacion, Kulturё, Rini dhe Sport lidhur me përgatitjet për fillimin e vitit të ri shkollor 2020-2022, tha se sfidë për vendin do të jetë edhe testi i maturës i cili do të mbahet me datën 29.

“Ne do të provojmë të gjejmë platformën më të mirë të mundshme. Ka edhe ofrues të shërbimit në Kosovë që kanë ofruar falas. Plani D nënkupton me përmbajtje të plot, na ofrohet falas në gjuhën shqipe. E vetmja kosto është deri 180 mijë euro. Ku gjithçka është e integruar, është shërbim 24 orë për prindërit mësimdhënësit e nxënësit. Na ofrohet prej një vendi mik”, tha Likaj.

I pyetur nga anëtari i Lëvizjes Vetëvendosje, Shpejtim Bulliqi se sa do të jetë kosto për të mbuluar këtë mënyrë të mësimit.

Për këtë, këshilltarja e ministrit Diellza Uka tha se kosto totale është 5,6 milionë.

” 5,6 milionë është i nevojshëm do të ndahen në sektorë. Gjithsej në distancë 2,7 milionë. Kemi edhe pajisjet të cilat janë siguruar nga donatorët me 1,7 milionë. Ne kemi bërë një vlerësim edhe për sigurimin e kushteve për mbajtjen e higjienës, është 2,5 milionë për komunat”, tha ajo.

Anëtari i Lëvizjes Vetëvendosje, Fitim Uka tha se shkurtimi i buxhetit për 11, 7 milionë euro do të jetë problematik.

“Në asnjë moment ne nuk kemi parë ulje të rasteve. Nëse këta skenarë janë të mbështetur në analizë specifike, ne kemi plotë 32 mijë nxënës të cilët nuk i janë nënshtruar mesmit online. Secili fëmijë që nuk mbërrin me ndjek edukimin dhe mësimin është shumë”, tha ai.

Ndërsa, anëtarja e Partisë Demokratike të Kosovës, Eliza Hoxha tha se do të jetë vështirë që të fillojë mësimi në shkolla e fakultete derisa higjiena vazhdon të jetë sfidë për vendin. Ajo tha se është dashur të diskutohet buxheti para se të vij në kuvend.

” Si do të organizohet shkolla për shkak të numrit të madh në shkolla. Kjo pandemi na ktheu në norma të reja teknike. Do të na kthej te higjiena bazë, kot ne mësohemi me i la duart, kur edhe sot në shkolla dhe fakultete higjiena është e tmerrshme. Është mirë një fushatë vetëdijësuese për fëmijët”, tha ajo. /KP/