Fermerët dhe bujqit ankohen për dëmshpërblimet nga vërshimet në Shkup

Sot po bëhen plot një vit nga dita kur rajoni i Shkupit u mbulua nga moti i keq me reshjet të shiut dhe erëra të fuqishme që shkaktuan vërshime nga të cilët humbën jetën 22 persona.

Fermerët dhe bujqit të cilët pësuan dëme të mëdha nga këto vërshime, ankohen se institucionet shtetërore nuk ju kanë paguar dëmshpërblimet e premtuara.

Kamer Imerit nga Haraçina vajton për dëmin që pësoi, ndërsa thotë se nuk ka marrë asnjë denarë dëmshpërblim. Ai shton se nuk ka para që të blejë kope tjetër.

“Ku të gjej unë tash dhen pa pare. Unë jam tu prit prej shtetit që të blej dhen. Por shteti nuk më lëshon pare. Prej qiellit nuk bien paret që të blej dhen”, tha për TV21, Kamer Imeri.

As dhjetëra fermerë tjerë nuk kanë marrë dëmshpërblimin që u takon. Njëri prej tyre është edhe Afrim Abdullahu. Ai ka mbetur vetëm me një lopë, disa pula dhe pëllumba. Përveç kësaj, ka humbur frigoriferë dhe kamion.

Edhe bujku Reshat Iseni është në hall. Edhe pse posedon të gjitha dokumentet për dëmet që ia shkaktoi uji, nuk ka marrë asgjë.

Nga Agjencia për Veterinari thonë se kanë dhënë dëmshpërblim për të gjithë të dëmtuarit, por këtë nuk po e thonë banorët të cilët ka një vit që kanë mbetur pa kopetë e tyre./TV21/Telegrafi/