Lajme Shqipëri

Fëmijët shqiptarë përballen me racizëm në Britani, ambasadori: Jepni fund fushatës së diskriminimit

Ambasadori shqiptar në Britaninë e Madhe, Qirjako Qirko bën thirrje për t’i dhënë fund ‘fushatës së diskriminimit’ mes debatit për mbërritjet e anijeve të vogla me emigrant nga Shqipëria

Fëmijët shqiptarë po i nënshtrohen bullizmit racist në shkollat e Mbretërisë së Bashkuar për shkak të debatit rreth emigrantëve, ka thënë ambasadori i Shqipërisë në Londër, raporton media britanike The Guardian.

Duke dhënë prova në komisionin e zgjedhur të parlamentit britanik për punët e brendshme, Qirko foli pasi shqiptarët u veçuan nga ministrat dhe media gjatë rritjes së fundit të numrit të qytetarëve të vendit të tij që udhëtonin nëpër Kanalin Anglez për të kërkuar azil në Mbretërinë e Bashkuar.

Ambasadori bëri thirrje për t’i dhënë fund “fushatës së diskriminimit” dhe paralajmëroi kundër forcimit të stereotipeve negative. Komentet e tij duket se synojnë qeverinë e Mbretërisë së Bashkuar pasi Suella Braverman, sekretarja e Brendshme, veçoi “kriminelët shqiptarë” gjatë një debati mbi krizën.

Qeveria, e inkurajuar nga mediat e djathta dhe deputetët, po kërkon të ndalojë shqiptarët që të kërkojnë azil në Mbretërinë e Bashkuar.

Qirko tha se më shumë se 140,000 shqiptarë që jetojnë në Britaninë e Madhe janë prekur negativisht nga debati, i cili “po përforcon stereotipet negative dhe racizmin”.

“Kjo fushatë diskriminimi ndaj shqiptarëve që jetojnë këtu në Britani të Madhe duhet të ndalet. Ka njerëz, sidomos të rinj, që bullizohen në shkolla sepse janë shqiptarë. Të gjithë ata që janë përgjegjës për këtë aktivitet duhet të kërkojnë falje”, tha ai.

Më herët ai u tha deputetëve se shqiptarët “mjekë, avokatë, inxhinierë, punëtorë të çdo lloji, paguajnë taksat dhe kontribuojnë në shoqërinë britanike”.

“Çdo paraqitje tjetër e ndryshme e shqiptarëve në Britani është një demonstrim i mungesës së njohjes së këtij realiteti. Përforcimi i stereotipeve negative për një kohë të gjatë nxit vetëm diskriminimin dhe racizmin”, tha Qirko.

Qeveria e Mbretërisë së Bashkuar thuhet se po planifikon një ndalim të plotë për këdo nga një listë e vendeve të përcaktuara “të sigurta” që kërkojnë azil.

Sipas ndryshimeve të propozuara, kërkesat do të refuzohen automatikisht.

Lëvizja është projektuar vë në shënjestër shqiptarët pasi më shumë se 12,000 mbërritën nga vendi ballkanik nëpërmjet varkave të vogla në nëntë muajt deri në shtator – që përbën rreth një të katërtën e të gjitha kalimeve të Kanalit.

Sipas The Guardian numri i shqiptarëve që vijnë në Britaninë e Madhe ka rënë gjatë dy muajve të fundit.

Më shumë se gjysma – 55 për qind – e azilkërkuesve të rritur shqiptarë ishin të suksesshëm në fazën fillestare të vendimit, sipas të dhënave të fundit të qeverisë.

Analiza nga Observatori i Migracionit të Oksfordit zbuloi muajin e kaluar se 86 për qind e shqiptarëve që morën vendime pozitive për aplikimet për azil breanda një viti ishin gra, leja e qëndrimit të të cilave u ishte dhënë mbi bazën se kishte të ngjarë të ishin trafikuar dhe nevoja për mbrojtje.

Robert Jenrick, ministri britanik i imigracionit, ka bërë thirrje që shqiptarëve tu “ndalohet” aplikimi për azil, sepse Shqipëria konsiderohet një vend i sigurt.

Qirko pohoi gjithashtu se Shqipëria ishte një vend i sigurt, duke pretenduar se shumë shqiptarë që vijnë në Britaninë e Madhe me varka të vogla e bëjnë këtë sepse janë emigrantë ekonomikë.

“Ky vend ka nevojë për punëtorë, ka vende të lira pune, [ndryshoni] legjislacionin britanik në mënyrë që ne të kemi këtë mundësi që njerëzit të mund të vijnë legalisht,” tha ai.

Dëshmitarë të tjerë kundërshtuan pretendimet se Shqipëria mund të kategorizohej si një vend i sigurt.

Andi Hoxhaj, një lektor i drejtësisë nga University College London, tha se një e treta e shqiptarëve jetonin nën kufirin e varfërisë dhe kishte 60 për qind papunësi. Ai tha se vrasjet si pasojë e kodit të sjelljes të njohur si “Kanun” ende kishin ndikim mbi jetët e shumë njerëzve në të gjithë vendin dhe se dhuna dhe korrupsioni i lidhur me bandat janë të përhapura.