Fejzi Aziri thotë se kërcënohet nga policia, më 5 shtator do të dëgjohen “bombat” për rastin “Monstra”

Sot në Gjykatën Penale në Shkup ka vazhduar gjykimi për rastin “Monstra”, i cili ka të bëjë me vrasjen e pesëfishtë në Liqenin e Smillkovës në prill të vitit 2012.

I akuzuari Fejzi Aziri, në seancën e sotme i është ankuar gjykatësit Ognen Stavrev se ka pasur kërcënime me jetë nga ana e policit i cili e ka sjellë nga burgu i Shtipit deri në Gjykatën Penale.

Aziri gjithashtu ka theksuar se duart i ka pasur të lidhura me pranga nga prapa edhe përkundër që ka kërkuar që në vitin 2014 që të mos i lidhen duart në atë mënyrë, sepse nuk ka mundur ta përballoj për shkak të sëmundjes, përcjell Telegrafi Maqedoni.

“Kam kërcënime me jetë nga polici i cili më sjell në Gjykatë. Thotë se do të na shkrep nga një plumb në kokë dhe të përfundoj me të gjithë ne. Prangat gjithashtu mi vendosin nga prapa, ndërsa unë jam i sëmurë dhe nuk mund ta përballoj këtë”, tha i akuzuari Fejzi Aziri.

Pas kësaj dëshmie të Fejzi Azirit përfaqësuesi i policisë së burgut i pranishëm në seancën gjyqësore deklaroi se kjo nuk është e vërtetë dhe se nuk ka kërcënuar Azirin e as ndonjë tjetër të akuzuar.

Aziri gjithashtu ka kërkuar që të vendoset në ndonjë burg në Shkup, sepse nuk ka mundur më tej të përballoj udhëtimin nga qytetet e tjera.

Në seancën e radhës, e cila do të mbahet më 5 shtator do të fillojë dëgjimi i “bombave” që kanë të bëjnë me këtë lëndë.

Nga ana e Prokurorisë në muajin korrik në Gjykatën Penale është dorëzuar material voluminoz, biseda telefonike dhe transkripta lidhur me vrasjen në Liqenin e Smillkovës.

Prokurorja Fatime Fetai tha se përveç bisedimeve të përgjuara që në PSP janë dorëzuar nga LSDM-ja, si dëshmi shtesë do të jep edhe disa biseda tjera që i ka marrë në telefonin e saj, nga persona tjerë./Telegrafi/