Fallxhorja në Shkup mashtron 43-vjeçaren, ia merr arin në vlerë prej një mijë eurosh

Një grua e kamufluar si fallxhore dhe shitëse ka mashtruar një grua 43-vjeçare nga Shkupi dhe i ka marrë ari në vlerë prej një mijë eurosh. Siç thonë nga MPB, gruaja fillimisht ishte paraqitur në derën e zonjës së shtëpisë dhe i kishte ofruar t’i shesë veshje të ndryshme.

Por, meqë gruaja kishte refuzuar të blejë diçka, shitësja i kishte kërkuar një kafe sa për të bërë pushim. Zonja e shtëpisë e kishte futur gruan brenda dhe i kishte ofruar kafe.

“Shitësja gjatë bisedës i ka treguar zonjës gjëra intime familjare dhe i ka zbuluar se është fallxhore dhe di të parashikojë ardhmërinë dhe të largojë të keqen nga shtëpia. I ka kërkuar të gjithë arin që e ka në shtëpi dhe i ka thënë se domoes i gjithë ari duhet të dërgohet në kishë për t’i fryrë dhe për ta larguar të keqen prej tyre. Ka premtuar se do të kthehet për një orë. Si garancë i ka lënë rrobat e saj që po i shiste dhe e ka marrë arin. Por, nuk është kthyer më”, thuhet në njoftimin e policisë.

Nga policia shtojnë se po punojnë për gjetjen e vjedhëses./Telegrafi/