A është ushqimi i maceve i sigurt edhe për qentë?

Gjithçka që duhet të dini për “vjedhjen” nga thesi i maces

Qentë dhe macet kanë nevoja të ndryshme ushqimore. Qentë janë omniuorë, që do të thotë se hanë mish dhe perime, ndërsa macet janë mishngrënëse, që do të thotë se duhet të hanë kryesisht mish.

Me fjalë të tjera, qentë kanë nevojë për ushqim më të larmishëm sesa macet. Përveç kësaj, qentë kanë nevojë për dhjetë aminoacide, ndërsa macet për njëmbëdhjetë.

Aminoacidi shtesë që ato kanë nevojë është taurina, e cila është jetike për shikimin normal, funksionin e zemrës, tretjen dhe një sistem të shëndetshëm imunitar, transmeton Telegrafi.

Për të plotësuar nevojat ushqyese të maceve, ushqimi i maceve përmban më shumë proteina të bazuara në mish, taurinë, kalori dhe yndyra sesa ushqimi i qenve.

Kjo mund të jetë një nga arsyet pse qenve u duket kaq i parezistueshëm ushqimi i maceve.

Nivelet më të larta të yndyrës dhe proteinave në ushqimin e maceve e bëjnë atë më aromatik dhe më të shijshëm. Ky lloj ushqimi ka shumë karbohidrate nga burimet e mishit dhe nuk përmban shumë përbërës bimorë.

A mund të hanë qentë ushqimin e qullët për mace?

Për disa këlyshë, të tillë si ata që po humbasin peshë, kanë oreks të reduktuar ose po luftojnë me kancerin, ushqimi i maceve mund të jetë një alternativë e shkëlqyer për ushqimin e qenve. Kjo pasi në këto raste ushqimi i maceve është më i shijshëm, më kalorik dhe më i ekuilibruar se disa dieta të përgatitura në shtëpi.

Sasi të vogla të ushqimit të maceve herë pas here gjithashtu nuk ka gjasa të dëmtojnë qentë e rritur të shëndetshëm. Megjithatë, dhënia e ushqimit të maceve për një periudhë të gjatë kohore mund të shkaktojë probleme gastrointestinale si diarre dhe fryrje, apo edhe reaksione alergjike, sepse ushqimi i lagësht i maceve nuk është testuar mjaftueshëm te qentë.

A mund të hanë qentë ushqim të thatë për mace?

Biskotat e maceve mund të jenë një alternativë shumë më e shëndetshme se ëmbëlsirat, në krahasim me ushqimet e zakonshme për njerëzit si pula, gjalpi i kikirikut dhe djathi.

Por përsëri, ushqimi i thatë i maceve është i përpunuar për të përmbushur nevojat ushqyese të maceve, jo të qenve. Ky lloj ushqimi ka shumë karbohidrate nga burimet e mishit dhe nuk përmban shumë përbërës bimorë. Përveç kësaj, ushqimi i thatë i maceve duhet të përtypet nga macet, dhëmbët e të cilëve janë më të mprehtë dhe më të hollë.

Kur ushqimi i maceve është i dëmshëm për qentë?

Nëse një qen përfundimisht kalon në një dietë të bazuar në mace, ai mund të fillojë të vuajë nga një sërë kushtesh shëndetësore. Disa nga problemet më të zakonshme që mund të ndodhin tek qentë që hanë rregullisht ushqim për mace përfshijnë:

▪ Çrregullime gastrointestinale. Një ndryshim i papritur në dietën e krijuar për një specie krejtësisht të ndryshme është pothuajse e sigurt se do të shkaktojë diarre te qentë.

▪ Pankreatiti. Një dietë e pasur me yndyrë, si ushqimi i maceve, mund të kontribuojë në zhvillimin e kësaj gjendjeje serioze që kërkon kujdes urgjent mjekësor.

▪ Probleme me dhëmbët. Ushqimi i maceve dhe biskotat janë shumë të vogla për të lejuar përtypjen e duhur, veçanërisht te këlyshët e racave të mesme dhe të mëdha.

Për qentë që vuajnë nga kushte të caktuara shëndetësore, edhe ngrënia e ushqimit të maceve në sasi të vogla dhe herë pas here mund të jetë problematike. Për shembull, nëse qeni juaj ka një trakt gastrointestinal të ndjeshëm, ushqimi i pasur i maceve mund të shkaktojë lehtësisht diarre ose të vjella.

Qentë me sëmundje të mëlçisë ose veshkave duhet të konsumojnë sasi të moderuar të proteinave, që do të thotë se duhet të shmangin ushqimin e maceve.

E njëjta gjë vlen edhe për qentë me mbipeshë, si dhe për ata të prirur për të zhvilluar pankreatitin, të cilët duhet të konsumojnë një dietë me pak yndyrë për të parandaluar inflamacionin ose për të nxitur humbjen e peshës. /Telegrafi/