Erdogan i Turqisë thotë se nuk do të flasë më me kryeministrin grek

Presidenti i Turqisë, Recep Tayyip Erdogan ka thënë se nuk e njeh më liderin e Greqisë fqinje dhe se do të refuzojë ta takojë atë në një samit të planifikuar.

Sipas BBC, përcjell Telegrafi, Erdogan akuzoi kryeministrin grek Kyriakos Mitsotakis se kërkon të bllokojë shitjen e aeroplanëve luftarakë F-16 të prodhimit amerikan në Turqi gjatë vizitës në SHBA.

“Nuk ka më njeri që quhet Mitsotakis në librin tim”, u tha Erdogan gazetarëve pas një takimi të kabinetit.

Ndërsa Greqia ka thënë se nuk do të hynte në një “konfrontim deklaratash”.

Mosmarrëveshja vjen mes kërcënimeve të Turqisë për të bllokuar një zgjerim të propozuar të NATO-s.

Ankaraja ka akuzuar Finlandën dhe Suedinë se strehojnë anëtarë të milicive kurde që sipas saj përbëjnë rrezik për Turqinë.

Erdogan akuzoi gjithashtu Greqinë, një aleat i NATO-s, se strehon “terroristë” dhe tha se lejimi i ripranimit të Athinës në bllokun e sigurisë në vitin 1980 ishte një gabim.

Tensionet janë rritur mes fqinjëve mesdhetarë pasi Mitsotakis kërkoi nga një sesion i përbashkët i Kongresit të SHBA-së që të mos heqë ndalimin e anëtarësimit të Turqisë në një program blerjeje për aeroplanin luftarak të gjeneratës së ardhshme F-35 javën e kaluar.

Por administrata e Joe Biden thuhet se ka marrë në konsideratë heqjen e ndalimit, të vendosur pasi Ankaraja bleu një sistem të mbrojtjes ajrore S-400 nga Rusia në vitin 2019.

Presidenti turk bëri të ditur gjithashtu se një takim me Mitsotakis më vonë këtë vit është anuluar,
duke u zotuar se “të mos pranojë kurrë të ketë një takim” me udhëheqësin grek.

Ndërsa Greqia dhe Turqia janë nominalisht aleatë të NATO-s, të dy vendet kanë një marrëdhënie të tensionuar mes vete që ka kërcënuar rregullisht të shpërthejë në konflikt të hapur.

Ata kanë qenë në mosmarrëveshje për statusin e Qipros që nga konflikti i vitit 1974 që ndau ishullin në dysh dhe në vitin 2020 Ankaraja vendosi anije luftarake për të eksploruar rezervat e gazit në ujërat e njohura ndërkombëtarisht si greke. /Telegrafi/