Emery flet për gjendjen e Xhakës: Mund të luajë këtë javë ndaj Southamptonit

Granit Xhaka mund të rikthehet këtë fundjavë për të luajtur me Arsenalin.

Ylli nga Kosova që prej 27 tetorit ka mbetur jashtë fushave për Arsenalin, pas problemeve që kishte me tifozët në ndeshjen ndaj Crystal Palace.

Xhaka mund të rikthehet të luaj për Arsenalin këtë fundjavë në ndeshje ndaj Southamptonit.

Këtë gjë e ka bërë të ditur trajneri i Topçinjve, Unai Emery në konferencë për shtyp.

“Xhaka duket më mirë nga ana psikologjike. Ne jemi duke e ndihmuar atë dhe duke i qëndruar afër”.

“Kam folur në mëngjes dhe kishim një bisedë të mirë. Ai u stërvit mjaft mirë para pushimit me kombëtaren dhe të njëjtën gjë e bëri dhe sot. Unë dua ta rikthej atë me skuadrën dhe të na ndihmojë. Jam i sigurt se do të bindë të gjithë tifozët me paraqitjet e tij”, deklaroi Emery.

“Ai ndihet më mirë dhe ka fituar sërish ndjenjën se Arsenali është ekipi i tij. Ai do të rikthehet dhe ne do të vendosim. Hap pas hapi do ta ndihmojmë atë të kthehet”.

“Rikthimi këtë javë? Do të vendosim nesër për rikthimin e tij ose jo, duke i dhënë besim”, tha Emery. /Telegrafi/