Elkos Group për Bajram dhuron 300 pako me ndihma ushqimore në Pejë

Tashmë ka kaluar në traditë që Elkos Group dhe ETC çdo festë të ndajnë një buxhet të konsiderueshëm për të përkrahur familjet në nevojë duke u mundësuar në mënyrë simbolike që edhe ata të kenë mundësi t’i gëzojnë këto festa.

Për festën e Kurban Bajramit Elkos Group dhe ETC kanë përgatitur rreth 300 pako familjare me produkte ushqimore, të cilat do shpërndahen përmes Bashkësisë Islame në Pejë ka thënë Arsim Selmonmusaj nga Elkos Group.

“Ne si kompani e kemi bërë traditë dhënien e ndihmave humanitare gjatë festave në republikën e Kosovës. Edhe kësaj radhe ne po shpërndajmë disa qindra pako me ndihma për disa familje që të kenë mundësi edhe ata ta festojnë Bajramin si familjet e tjera që kanë mundësi festimi”, tha për RTV Dukagjinin, Arsim Selmonmusaj.

Hoxhë Enes Goga kryetar i BIK-ut në Pejë, ka thënë se kjo traditë tashmë po ndihmon që familjet në nevoje të kalojnë Kurban Bajramin si të gjitha të tjerat, përcjell Telegrafi.

“Gjatë gjithë bajrameve edhe kësaj radhe kompania Elkos me pronarin e saj Ramiz Kelmendi, edhe për festë të Kurban Bajramit kanë ndarë qindra pako ushqimore për qytetarët anë e mbanë territorit të Republikës së Kosovës”, deklaroi Enes Goga.

Ditë më parë Elkos Group ka ndarë ndihma edhe për organizatën “Handikos” në Pejë me pako higjienike./Telegrafi/