Ekzekutimi i babë e bir në Klos, familja Shira hap dyert e mortit

Familja e dy viktimave, Ilir dhe Kenado Shira në Fullqet të Klosit, ka hapur dyert e mortit.

Gazetarja Raziela Myslimaj ndodhet pranë banesës së viktimave, por asnjë nga familjarët nuk pranon të flasë për ngjarjen e rëndë.

Të afërm, miq dhe banorë të zonës janë duke shkuar në banesë për të shprehur ngushëllimet për vdekjen e Ilir dhe Kenado Shirës.

Si ndodhi ngjarja me 3 të vdekur në Klos:

Pak minuta para ngjarjes së rëndë, autori Fiqiri Mjeshtri së bashku me dy vëllezërit e tij u takuan përpara një lokali me Ilir Shirën, Kenado Shirën, Danjel Hasulën dhe Eglantin Hasulën.

Ngacmimi në Instagram i vajzës së Fiqiri Mjeshtrit ka qenë shkaku i ngjarjes së rëndë.

Të 7 personat debatuan me njëri-tjetrin për pak minuta në lokal dhe më pas autori nxorri armën dhe qëlloi në drejtim të Ilir Shirës, Kenado Shirës, Danjel Hasulës dhe Eglantin Hasulës.

Nga breshëria e plumbave mbeti i vrarë Ilir dhe Kenado Shira, ndërsa të plagosur Danjel dhe Eglantin Hasula.

Autori u largua nga vendi i ngjarjes bashkë me dy vëllezërit e tij dhe më pas u gjet i vetëvrarë në banesën e tij, në fshatin Dars.

Dy vëllezërit e Mjeshtrit janë arrestuar nga Policia. /Euronews Albania/