Eksperti mjekoligjor: Marigona Osmani vdiq si pasojë e lëndimeve të rënda

Eksperti mjeko-ligjor nga Instituti i Mjekësisë Ligjore, Naim Haliti, tha se vdekja e Marigona Osmanit ka qenë e dhunshme dhe ka ardhur si pasojë politraumës.

Këtë deklarim, Haliti e bëri të martën, në Gjykatën Themelore të Ferizajt, në rigjykimin ndaj Dardan Krivaqës dhe Arbër Sejdiut, të cilët po akuzohen për dhunimin dhe vrasjen e të ndjerës, Marigona Osmanit.

“Ne kemi përshkruar se vdekja e të ndjerës ka ardhë si pasojë e lëndimeve të shumëfishta që ndryshe quhen politraumë, të cilat kanë ardhë si pasojë e dëmtimit të organeve vitale trupore të shkaktuara nga mjetet prehëse”, tha eksperti Haliti.

Kryetari i trupit gjykues, Sahit Krasniqi e ka pyetur ekspertin Haliti se lëndimet e përshkruara në ekspertizë, a janë bërë gradualisht apo si kanë ndodhur ato lëndime që i ka përjetuar tani e ndjera.

“Pas ekzaminimut i kemi shikuar të gjitha lëndimet veç e veç, të gjitha i kemi specifikuar në konkluzion. Këto lëndime vdekjeprurëse disa prej tyre, kanë ndodhur sa viktima ka qenë gjallë”, ka sqaruar Haliti.

I njëjti tha se lidhur me mekanizmin e dhimbjeve në aspektin mjekësor, tek tani e ndjera ato kanë qenë të rënda në aspekt mjekësor.

Mbrojtësi i të akuzuarit Dardan Krivaqa, avokati Skender Musa e ka pyetur ekspertin lidhur me shkallën e tramadolit, a është përcaktuar ndikimi negativ apo efektet anësore. Eksperti në lidhje me këtë pyetje tha se asnjë substancë narkotike nuk mund të përcaktohet sakët, ngase sipas tij, IML nuk posedon  një aparaturë të tillë.

Tutje, u lexuan provat materiale nga shkresat e lëndës, ku mbrojtësi i të akuzuarit Krivaqa, avokati Musa kishte vërejtje lidhur me raportin e mjekësisë ligjore, ngase sipas tij, ky raport nuk është i kompletuar.

“Kemi vërejtje në raportin e mjekësisë ligjore, sepse nuk është i kompletuar. Siç dëgjuam edhe ekspertin, Instituti i Mjekësisë Ligjore nuk ka arritur të përcaktoj shkallën e toksikologjisë e ardhur nga substancat narkotike e llojit marihuanë”, tha avokati Musa, raporton “Betimi për Drejtësi”.

Ai propozoi që për analizën toksikologjike të merren mostrat nga IML dhe të dërgohen në ndonjë laborator jashtë vendit, që sipas avokatit do të mundësohet të vërtetohet se a ka pas ndikim në vdekjen e të ndjerës përdorimi i substancave narkotike.

Avokati Musa, po ashtu propozoi që i akuzuari Krivaqa të dërgohet në Institutin e Forenzikës Neuropsikiatrike në Prishtinë, në afat prej 14 ditëve në mënyrë që të hulumtohet jeta e tij që nga klasa e 5-të fillore, ndikimi i substancave narkotike në jetën e tij, ndikimi i tentim vetëvrasjes në qendrën e mbajtjes në Lipjan si dhe ndikimi i dhunimit të tij në Burgun e Dubravës.

Lexo po ashtu Seanca e radhës ndaj Krivaçës e Sejdiut do mbahet më 11 qershor

Ndërkaq, mbrojtësja e të akuzuarit Arbër Sejdiu, avokatja Arbnora Shefkiu, në lidhje me propozimet e avokatit Musa, tha se lë në diskrecion të gjykatës.

Prokurori Valdet Avdiu, tha se nuk i sheh të arsyeshme propozimet e avokatit mbrojtës, sa i përket propozimit që i akuzuari Krivaqa të dërgohet në Institutin e Forenzikës Neuropsikiatrike, ngase sipas tij, i njëjti ka qenë njëherë në këtë institut dhe sërish do të jetë një konstatim i ngjashëm, andaj i ka refuzuar propozimet e avokatit si të parëndësishme në këtë fazë të gjykimit.

Përfaqësuesi i palës së dëmtuar, avokati Gazmend Rexhepi po ashtu i ka refuzuar propozimet e avokatit Musa.

Gjykatësi Krasniqi, mori vendim në bazë të së cilit ka refuzuar propozimet e avokatit Musa, i njëjti tha se trupi gjykues këto propozime i konsideron të panevojshme.

Tutje, avokati Musa tha se për seancë të sotme nuk janë të gatshëm për të dhënë mbrojtjen, andaj propozoi që gjykimi të shtyhet për një datë tjetër.

Në këto rrethana, seanca e radhës për këtë rast u caktua për një datë tjetër, ku pritet që gjykimi do të vazhdojë me mbrojtjen e të akuzuarve.

Ndryshe, Gjykata Themelore e Ferizajt më 4 gusht 2023 e ka dënuar me burgim të përjetshëm Dardan Krivaqën për vrasje e Marigona Osmanit. Ndërsa ishte liruar nga akuza për dhunim. Arbër Sejdiu ishte dënuar me 15 vite burgim për ndihmë në vrasjen e rëndë në bashkëkryerje. Sejdiu ishte liruar nga vepra penale e ndihmës në dhunim.

Por, Gjykata e Apelit me aprovimin e ankesës së Prokurorisë Themelore në Ferizaj dhe mbrojtjes së dy të akuzuarve, e ka kthyer çështjen në rigjykim.

18 vjeçarja Marigona Osmani u vra më 22 gusht të vitit 2021 në banesën e të akuzuarit kryesor, Dardan Krivaqa, në qytetin e Ferizajt.

Sipas aktakuzës, Dardan Krivaqa thuhet se më 21 gusht 2021, rreth orës 10:14, në banesën e tij, pa pëlqimin e tani të ndjerës Marigona Osmani, e kishte detyruar atë të kryente marrëdhënie seksuale dhe e kishte abuzuar e maltretuar në forma të ndryshme.

Një ditë më pas, më 22 gusht 2021, Krivaqa dhe Sejdiu akuzohen se kanë privuar nga jeta Marigona Osmanin, në përpjekje për të fshehur veprën penale të dhunimit.

Më 14 korrik 2022, ishte mbajtur seanca fillestare ku Dardan Krivaqa ka shfrytëzuar të drejtën të mbrohet në heshtje, kurse Arbër Sejdiu, është deklaruar i pafajshëm.

Krivaqën, Prokuroria e ngarkon me veprën penale vrasje e rëndë dhe dhunim, kurse Sejdiu po akuzohet për veprën penale vrasje e rëndë dhe ndihmë në kryerjen e dhunimit.

Sipas aktakuzës, i pandehuri  Dardan Krivaqa më 21 gusht 2021, rreth orës 10:14, në banesën e tij në rrugën “Ramadan Rexhepi”, në Ferizaj, pa pëlqimin e tani të ndjerës Marigona Osmani, e kishte detyruar të njëjtën për të kryer marrëdhënie seksuale, e cila siç thuhet në aktakuzë përcillet me tortura.

Gjithnjë sipas aktakuzës, aty thuhet se i pandehuri Krivaqa fillimisht pa dëshirën e tani të ndjerës ka kryer marrëdhënie seksuale në sallon, pas kryerjes së aktit seksual të njëjtën të zhveshur e kishte dërguar në banjo, nga aty me dhunë e kishte dërguar në dhomën e gjumit, mirëpo me kalimin e kohës për shkak të gjendjes së rëndë shëndetësore tani e ndjera Marigona Osmani si pasojë e dhunës së ushtruar kishte humbur aftësinë për të rezistuar, e ku në dy raste në mbrëmje kishin kryer marrëdhënie seksuale, pastaj i pandehuri Dardan të zhveshur e kishte dërguar në banjë, e ku i vërehen edhe lëndimet në trup.

Me këtë, akuzohet se ka kryer veprën penale “Dhunimi” nga neni 227, par. 4, nënpar 4.1, lidhur me par.1 të Kodit Penal.

Sipas dispozitivit të dytë të kësaj aktakuze, i pandehuri Arbër Sejdiu më 21 gusht 2021, në banesën e të pandehurit të parë në rrugën “Ramadan Rexhepi”, në Ferizaj, me dashje i kishte ndihmuar të pandehurit Dardan Krivaqa në kryerjen e veprës penale të dhunimit.

Sipas aktit akuzues thuhet se fillimisht dy të pandehurit kishin kontaktuar përmes telefonit dhe ishin takuar në qytet, pastaj së bashku ishin kthyer në banesë, ku i pandehuri Arbër posa kishte arritur, duke qenë në dijeni se i pandehuri Dardan është duke e dhunuar tani të ndjerën Marigona Osmani, me dashje kishte marrë veprime me të cilat lehtësohet kryerja e dhunimit.

Tutje thuhet se dy të pandehurit së bashku kishin hyrë në dhomën ku kryhet dhunimi, e ku e ndjera ishte e zhveshur, e të cilin veprim gjatë qëndrimit në banesë e merr disa herë, po ashtu dhe gjatë asaj kohe kishte përcjellë gjendjen nëse ndonjë nga banorët është duke lëvizur aty pari.

Siç e përshkruan aktakuza, i pandehuri Arbër Sejdiu po ashtu edhe disa herë kishte dalë nga banesa për të blerë gjëra ushqimore, ndërsa gjatë gjithë kohës dy të pandehurit kishin biseduar mes vete, kështu tutje, të pandehurit Dardan Krivaqa i kishte dhënë telefonin për të thirrë kompaninë e cila menaxhon kamerën, që ishte e vendosur në korridorin e banesës me qëllim që të fshihen video-incizimet, gjegjësisht provat e veprës penale.

Me këtë, Sejdiu akuzohet se ka kryer veprën penale “Ndihmë në kryerjen e dhunimit” nga neni 227, par 4, nënpar. 4.1, lidhur me par. 1 dhe nenin 33 të Kodit Penal.

Kjo aktakuzë në dispozitivin e III-të, dy të pandehurit Dardan Krivaqa dhe Arbër Sejdiu i ngarkon për veprën penale të vrasjes së rëndë në bashkëkryerje.

Aty thuhet se më 22 gusht 2021, në banesën e të pandehurit Dardan Krivaqa, në rrugën “Ramadan “Rexhepi”, në Ferizaj, me dashje dhe në bashkëkryerje, me qëllim të fshehjes së veprës penale dhunimi e kanë privuar nga jeta tani të ndjerën Marigona Osmani, me të cilën i pandehuri i parë ishte në bashkësi jashtëmartesore.

Tutje, sipas aktakuzës, përshkruhet se në intervale kohore nga ora 10:56 deri në orën 14:43, i pandehuri i parë kishte marrë një shkop, e së bashku me të pandehurin e dytë kishin hyrë në dhomë dhe kishin filluar ta godasin tani të ndjerën në pjesë të ndryshme të trupit, me ç’rast të njëjtës i kanë shkaktuar dhimbje të mëdha fizike dhe psiqike, ku nga goditjet e njëjta ka pësuar politrauma-lëndime të shumëfishta, ku vdekja shkaktohet drejtpërdrejt nga asfiksia mekanike, si dhe shoku hemorragjik dhe traumatik, të cilat janë pasojë e gjakderdhjes së jashtme dhe gjakderdhjes së brendshme, nga thyerja e ashtit të nofullës së poshtme, thyerja e brinjëve, klavikulës së majtë, unazave të qafës, gjakderdhjes epidurale dhe subdurale në pjesën e pasme të trurit të madh dhe në trurin e vogël, këputje parciale të palcës së kurrit në qafë, të njëjtën e dërgojnë në Spitalin e Përgjithshëm – Qendrën Emergjente në Ferizaj dhe largohen nga aty.

Me këtë, akuzohen se në bashkëkryerje kanë kryer veprën penale “Vrasja e rëndë” nga neni 173, par. 1, nënpar. 1.3, 1.4 dhe 1.7, lidhur me nenin 31 të Kodit Penal. /BetimiperDrejtesi/