Edhe pse Haradinaj ia vazhdoi mandatin, MF-ja shpall konkurs për drejtor të Doganave (Dokument)

Qeveria Kurti që në javët e para të saj ka nisur me shfuqizimin e vendimeve të marra gjatë qeverisjes Haradinaj.

Kryeministri Albin Kurti, ditë më parë bëri të ditur se të gjitha emërimet që janë bërë pas dorëheqjes së ish-kryeministrit Ramush Haradinaj do të rishqyrtohen.

E një gjë e tillë duket se do të ndodhë edhe me zgjatjen e mandatit që iu bë nga ish-kryeministri Haradinaj, drejtorit të Doganave, Bahri Berisha.

Ministria e Financave tashmë ka shpallur konkurs për pozitën e drejtorit të Doganave.

Lexo po ashtu Haradinaj ia vazhdon edhe për tri vite mandatin drejtorit të Doganës

Me vendimin e ministrit Besnik Bislimi nënkupton se është shfuqizuar vendimi që Haradinaj mori në fund të muajit janar. Ani pse mandati i Berishës do të përfundonte më 8 shkurt të këtij viti, më 24 janar ai mori mandatin e dytë, trevjeçar nga ish-kryeministri Ramush Haradinaj.

“Në kuadër të kompetencave të mija kushtetuese e ligjore, sot, drejtorit të Përgjithshëm të Doganës së Kosovës, Bahri Berisha, i vazhdova mandatin edhe për tri vite. Z. Berisha, përgjatë shërbimit të tij në këtë pozitë ka dëshmuar profesionalizëm e korrektësi dhe me seriozitet ka kryer punët dhe përgjegjësitë e tija në këtë institucion shumë të rëndësishëm të vendit. Z. Berisha i uroj punë të mbarë edhe për vitet e tjera!”, kishte shkruar Haradinaj në Facebook.

Në konkursin e ri të hapur nga MF-ja, thuhet se kërkohet Drejtor i Përgjithshëm i Doganës së Kosovës.

“Dogana e Kosovës është institucioni i vetëm kompetent për të ushtruar funksionet doganore në emër të Republikës së Kosovës. Detyrat dhe përgjegjësitë e Drejtorit të përgjithshëm të Doganës së Kosovës janë paraparë me nenin 6 dhe 7 të Kodit Doganor dhe të Akcizave në Kosovë Nr. 03/L -109, i plotësuar dhe ndryshuar me Ligjin Nr. 04/L-099, Ligjin Nr. 04/L-115 dhe me Ligjin Nr. 04/L-273, me të cilin kod janë përcaktuar edhe detyrat dhe përgjegjësitë e Doganës së Kosovës. Në përputhje me nenin 5 të Kodit Doganor dhe të Akcizave, Ministri i Financave dhe Transfereve shpallë konkursin për Drejtor të përgjithshëm dhe themelon komision për përzgjedhjen e kandidatit të rekomanduar, të cilin më pastaj e emëron Kryeministri i Republikës së Kosovës”, thuhet në përshkrimin e përgjithshëm të konkursit. /Telegrafi/