E vërteta e fitores 40:0 të Feronikelit, vashat e Drenicës e kanë bojkotuar klubin: Jemi në bojkot, që tri vite nuk kemi marrë paga

Një rezultat i pabesueshëm ka ndodhur ditën e djeshme në Superligën e Kosovës në futboll për femra.

KFF Feronikeli ka shënuar fitore të pabesueshme 40:0 ndaj rivali rajonal KFF Drenicës.

Fitorja e Niklit ka bërë bujë të madhe jo vetëm në Kosovë, por edhe në rajon, pasi është një rezultat i pabesueshëm.

E vërteta e kësaj ndeshje është se KFF Drenica ka luajtur me futbolliste nën moshën 16 vjeçare, pasi të gjitha vashat e ekipit të parë janë në bojkot.

Arsyeja që vashat e ekipit të parë kanë bojkotuar klubin është se nuk kanë marrë paga.

Lexo po ashtu Rezultat i frikshëm në futbollin e femrave në Kosovë: Feronikeli mposht Drenicën 40-0, Bajrami shënon 22 gola

Këtë për Telegrafin e ka konfirmuar futbollistja e Drenicës, Florentina Haliti.

“E vërteta e kësaj ndeshje është se ne vashat e ekipit të parë nuk kemi luajtur ndaj Feronikelit dhe Drenica është paraqitur me futbolliste nën 16 vjeçe”, tha fillimisht Florentina për Telegrafin.

“Ekipi i parë jemi në bojkot që një javë, për arsyeje se nuk jemi paguar asnjëherë nga klubi, edhe pse kemi pasur gjithmonë premtime për tu paguar”.

Haliti thotë se vashat e Drenicës nuk kanë marrë para nga klubi që tri vite dhe pritjes i ka ardhur fundi.

“Ka tri vite që nuk kemi marrë paga nga klubi, edhe pse premtimet nuk kanë munguar asnjëherë, por kanë qenë premtime boshe”, deklaroi Florentina.

Haliti ka thënë se në rast se nuk fillojnë të marrin paga nga klubi, atëherë bojkoti do të vazhdoj nga të gjitha futbollistet e ekipit të parë të KFF Drenicës. /Telegrafi/