A duhet të shqetësoheni nëse partneri juaj është ende mik me ish-in?

Ideja që një partner të mbajë ende lidhje miqësore me ish-in mund të shkaktojë pasiguri dhe dyshime

Pyetje të tilla si: “A është vërtet një miqësi e pastër?” apo “A ka ende ndjenja të pazgjidhura?” janë të zakonshme dhe shpesh sjellin një ndjesi shqetësimi.

Reagimi emocional: Pse ndodh?

Sipas psikologes Sabrina Romanoff, është shumë normale të ndiheni në siklet kur mësoni se partneri ruan kontaktet me ish-in. Kjo ndodh sepse ka shumë paqartësi rreth natyrës së kësaj marrëdhënieje – cilat janë qëllimet e tyre, çfarë lloj afrimiteti ruajnë dhe çfarë mund të ndodhë në të ardhmen.

Një tjetër arsye pse kjo situatë mund të duket shqetësuese është fakti që shumica e njerëzve nuk e konceptojnë dot miqësinë mes ish-partnerëve, veçanërisht nëse nuk ka ekzistuar një miqësi e mirëfilltë përpara lidhjes romantike.

Përvoja të kaluara romantike dhe intime nuk zhduken plotësisht dhe mund të rindezen lehtësisht nëse dy njerëz afrohen përsëri, shkruan Verywell Mind.

Pse disa njerëz qëndrojnë miq me ish-in?

Në disa raste, mbajtja e një raporti miqësor me ish-in mund të ketë një arsye praktike. Ata mund të ndajnë kujtime të rëndësishme, miq të përbashkët, kafshë shtëpiake apo edhe fëmijë, duke i bërë të detyrueshme kontaktet mes tyre.

Megjithatë, jo të gjithë e pranojnë këtë ide. Për disa, mbajtja e kontakteve me ish-in shihet si diçka jo e shëndetshme për një lidhje.

Disa njerëz besojnë se sa më gjatë të zgjasë një miqësi e tillë, aq më shumë rrezikohet stabiliteti i marrëdhënies aktuale. Sipas këtij këndvështrimi, ekziston frika se një miqësi me ish-in mund të çojë në mendime apo ndjenja të fshehura që në një moment mund të kthehen në burim konflikti.

Si të vlerësohet situata?

Para se të nxirren përfundime, është e rëndësishme të analizohet dinamika mes partnerit dhe ish-it të tij. Disa pyetje që mund të ndihmojnë për të kuptuar situatën janë:

• Sa kohë kanë qenë në një lidhje?
• A kanë qenë miq përpara se të lidhnin romancë?
• A ndajnë fëmijë, kafshë shtëpiake apo miq të përbashkët?
• Si ka përfunduar lidhja e tyre?
• Sa kohë ka kaluar që nga ndarja?

Nëse marrëdhënia mes tyre ka përfunduar pa drama apo ndjenja të pazgjidhura dhe raporti aktual është i distancuar, atëherë mund të mos ketë arsye për shqetësim. Nga ana tjetër, nëse ish-i vazhdon të jetë një figurë e pranishme në jetën e partnerit në mënyrë të vazhdueshme, atëherë lind nevoja për diskutim.

Në fund të fundit, çdo marrëdhënie ka rregullat e saj të brendshme dhe mënyra më e mirë për ta trajtuar këtë çështje është komunikimi i hapur dhe ndershmëria mes partnerëve. /Telegrafi/