Dugolli: Pozita po përballet padrejtësisht me protestat e veteranëve, askush nuk ndihet mirë me skena të tilla

“Mjerisht ajo që pamë ishte se shoqatat e dalura nga lufta po instrumentalizohen nga politika dhe historia e kësaj proteste dhe këtij refuzimi që ndodhi sot, është një histori pesë vjecare e cila lidhet pikërisht me këto parti politika të cilat ishin atëherë në pushtet në 2016-2017, të cilat e patën plotësuar-ndryshuar ligjin për veteranët dhe kategoritë e dala nga lufta, të cilët e patën larguar nenin 18 i cili e ndërlidhte pagesat për veteranët me pagën minimale”, ka thënë ai.

Sipas Dugollit, pozita po përballet “padrejtësisht” me një kauzë të cilën siç thekson ai “po e sforcojnë këto parti politike”.

“Partitë poltiike që po i nxisin, duhet të jenë të sinqertë me ta sepse nuk bëhet fjalë për ligjin e veteranëve, bëhet fjalë për ligjin për pagën minimale, dhe këto gjëra janë të ndara”, ka thënë Dugolli në  RTV Dukagjini. Ku u diskutua për pagën minimale dhe protestën e veteranëve.

Dugolli ka potencuar se ndonëse nuk është mirë që të luhet me këto kategori, të njëjtit “nuk do të duhej të bien pre, nuk do të duhej që të shërbejnë për agjenda të ndryshme politike të partive të ndryshme politike”.

Kryetari i Aleancës për Ardhmërinë e Kosovës, Ramush Haradinaj, kishte reaguar ashpër pas fjalimit të deputetit Armend Muja, për projektligjin për pagën minimale, ku janë përjashtuar veteranët e luftës së UÇK-së.

Ai në seancën e sotme të Kuvendit ka thënë se është turp i madh, që njerëzit e zgjedhur nga populli si Muja, të arrijnë në këtë pikë që të diskutojnë, për ndryshimin e ligjit të pagës minimale.

“Është turp për krejt juve, edhe për ty Glauk Konfjuca, djali i Sherif Konjufcës, duhet t’iu vije marre që kemi ardhur deri te kjo pikë, që për 35-40 euro të tyre, të vijmë deri në këtë pikë”, ka thënë Haradinaj.

“Është marre, a jeni njerëz a çka jeni? S’keni me mujt me kalu këtë ligj, turp të keni, nuk bën me lujt, me i poshtëru veteranët”, ka vazhduar ai.

Dugoli, teksa e ka komentuar deklaratën e Haradinajt, ka thënë se “turp është të gënjesh dhe të manipulosh”.

“I ka përmendur disa deputetë që janë edhe veteranë, edhe të ish të burgosur, edhe familje e dëshmorëve, dhe ai në këtë kuptim u mundua të potencojë që është turp, por turp është të gënjesh dhe të manipulosh”, shtoi ai.

“Ne nuk po gënjejmë, sepse po themi se ligji për pagën minimale nuk ndërlidhet asgjë me ligjin për veteranët, dhe ansjëherë nuk kemi thënë se ligji për veteranët nuk do ta bëjmë ligj më të mirë dhe të shihet mundësia se si ta avancojmë pozitën e kësaj kategorie, por në këtë formë që është ngritur, dhe që po bëhet një lloj kauze, besoj që edhe partitë politike por edhe veteranët duhet ta kuptojnë se nuk do të sjellë asgjë të mirë as për ta as për shtetin e Kosovës”, ka thënë ai.

Megjithatë, ai ka theksuar se nuk është ndier mirë nga skenat e kryera gjatë protestës së veteranëve.

“Askush nuk ndihet mirë me skena të tilla, për shkak se ne vlerësojmë kontributin e veteranëve, luftëtarëve të lirisë dhe jemi që të bashkëpunojmë e të koordinohemi e që të bashkëveprojmë së bashku që t’ua përmisojmë sado pak jetën e tyre”, ka thënë ai.

Po ashtu, deputeti Dugolli ka kërkuar hapësirë që të merren me përfundimin e ligjit të pagës minimale e pastaj t’i kthehen ligjit të veteranëve.

“Sepse e dimë se ka shumë anomali edhe në atë ligj, ka shumë paqartësi e padrejtësi dhe diskriminim. Përfaqësuesit e këtyre kategorive që janë shoqatat duhet të mendojnë për veteranët dhe jo për partitë politike, për veteranët dhe interesat e tyre, për shkak se sikur të mendonin për veteranët mendoj që kjo protestë është dashur të bëhej në 2017”.

Dugolli: Jemi të vendosur që ta shtyjmë përpara ligjin për pagën minimale

Dugolli ka theksuar se partia në pushtet është e vendosur që ta shtyjë ëprpara ligjin për pagën minimale për shkak se po presin më shumë se 100 mijë punëtorë në sektorin privat.

Kur pyetet se si do ta shtyjnë përpara këtë ligj, ai deklaron se do ta votojnë në parlament, dhe arsyeja e mosvotimit gjatë seancës së gjashtë qershorit, sipas tij ishte mungesa e kuorumit.

“Do ta votojmë në parlament ligjin për pagën minimale. Mazhoranca e ka për detyrë që t’i shtyjë përpara agjendat qeveritare, ligjet që përmirësojnë jetën e qytetarëve. Sot nuk e patëm për shkak se disa nga deputetët ishin në udhëtime zyrtare dhe nuk kishte kuorum”, ka thënë ai.

“Shteti nuk ndërtohet me shantazhe dhe kërcënime”

Shteti nuk ndërtohet me shantazhe dhe kërcënime, është projekt i përbashkët edhe i pozitës dhe opozitës, dhe në këtë drejtim duhet të jetë e qartë se dhuna apo kërcënimet dhe shantazhet nuk do të duhej të kishte vend në institucionet e Kosovës, ka thënë Dugolli.

“Shpresojmë që veteranët ta shohin dhe mirëkuptojnë me gjakftohtësi këtë që po e themi, të fillojnë dhe të bashkëpunojnë me qeverinë që shumë shpejt të fillojmë të punojmë me ligjin e veteranëve dhe të rregullohet çështja e tyre duke e pasur parasysh se gjendja e tyre nuk është e mirë, gjendja e tyre kërkon edhe një angazhim shtesë që të përmirësohet kualiteti i jetës së tyre por kjo kërkon bashkëpunim”, ka thënë Dugolli.

“I siguroj veteranët, se vullneti i qeverisë së Kosovës,i kryeministrit  Kurti është që të zgjidhet kjo cështje dhe të punohet në këtë drejtim”, shtoi Dugolli.

Kjo sepse “ata thonë” se Kurti nuk është i angazhuar dhe nuk është i predispozuar që të zgjidhet kjo çëshjte, “gjë që nuk është e vërtetë”./Portali D/