“Do doja ta shihja te Barcelona apo Real Madridi”, Salah këshillohet të largohet nga Liverpooli

Ish-sulmuesi i Valencias dhe Algjerisë, Rabah Madjer i ka kërkuar sulmuesit Mohamed Salah të largohet nga Liverpooli, teksa ka treguar edhe ku dëshiron ta shohë në të ardhmen e afërt.

Salah ka shumë vite me fanellën e Liverpoolit, duke fituar çdo trofe të mundshëm, nga Liga e Kampionëve te Liga Premier.

Megjithatë, viteve të fundit emri i tij është përfolur shumë për një largim nga Anfield, ndërsa tani janë shtuar zërat edhe më shumë.

Lexo po ashtu Liverpooli mund të bie edhe më poshtë, Salah po mendon largimin nga klubi

Është ish-sulmuesi Madjer, i cili ka thënë se Salah ka ende kohë për të bërë një lëvizje te Real Madrid ose Barcelona.

“Salah është një lojtar i madh. Liverpooli është një ekip shumë i madh që e ndihmoi atë të zbulonte talentin e tij, gjë që Chelsea nuk arriti ta bëjë”, ka thënë fillimisht Madjer për Al Ain.

Lexo po ashtu Salah dhe Mac Allister, dy objektivat e mëdha të Real Madridit

“Zgjatja e kontratës së tij ishte një njohje e mrekullueshme e asaj që ai ka arritur në Anfield, por personalisht do të doja ta shihja Salah në fanellën e një prej gjigantëve të futbollit spanjoll – Barcelonës apo Real Madridit”.

“Kjo do t’i japë një shtysë të re karrierës së tij”, përfundoi ish-sulmuesi algjerian. /Telegrafi/