Botë Ballkan Bosnja

Dodik mund të shkojë në burg për shkak të Srebrenicës

Para 4 vitesh

Një vendim i Përfaqësuesit të Lartë ndërkombëtar në Bosnjë dhe Hercegovinë, Valentin Inzko, i cili miraton Ligjin mbi Ndryshimet në Kodin Penal të BeH, trajton veçanërisht autorët e gjenocidit në institucionet qeveritare.

Në këtë drejtim, shkruajnë mediat serbe, përcjell Telegrafi, ndalimi i mohimeve të gjenocidit në Srebrenicë vlen posaçërisht për zyrtarët.

Kështu, siç vë në pah Alo.rs, në nenin përkatës shkruan: “Kryerësi i veprës penale të përmendur në paragrafët (1) deri (4) të këtij neni i cili është një person zyrtar ose përgjegjës ose punonjës i një institucioni qeveritar ose ndonjë organi të financuar nga buxheti publik, dënohet me burgim për një afat jo më pak se tre vjet”.

Praktikisht, siç shkruan portali i Sarajevës “Avaz“, Milorad Dodik, një anëtar i Presidencës së BeH, i cili mohoi gjenocidin disa herë në konferencën për shtyp sot, mund të jetë ndër të parët që do të goditet nga këto dispozita të reja të Kodit Penal të BeH.

Vendimi me të cilin Valentin Inzko vendosi ndryshime në Kodin Penal të BeH, i cili ndalon dhe ndëshkon mohimin e gjenocidit, tregon se ai është një urrejtës tipik serb, tha më parë sot anëtari serb i presidencës së BeH, Milorad Dodik, në një konferencë të jashtëzakonshme për shtyp.

Ai përsëriti pretendimin e tij se nuk kishte gjenocid në Srebrenicë dhe njoftoi një përgjigje të ashpër nga RS javën e ardhshme, e cila mund të jetë një vendim mbi pavarësinë e asaj pjese të BeH.

Ndryshe, Valentin Inzko, duke i përdorur kompetencat e Bonit, vendosi ndryshime në Kodin Penal të këtij shteti, me të cilat ndalohet dhe dënohet mohimi i gjenocidit dhe madhërimi i kriminelëve të luftës.

Kompetencat e Bonit i japin atij të drejtë për të shtyrë përpara vendime, për të cilat, akterët e tjerë politikë nuk shfaqin vullnet për një gjë të tillë. Inzko e mori këtë vendim, disa ditë para përfundimit të mandatit të tij në Bosnje.

“Së pari, theksoj se pajtimi nuk mund të ndodhë pa njohjen e krimeve dhe pa përgjegjësi. Gjuha e urrejtjes, madhërimi i kriminelëve të luftës dhe revizionizmi, pra mohimi i hapur i gjenocidit dhe krimeve të luftës, parandalojnë shoqëritë nga përballja me të kaluarën e tyre kolektive, përfaqësojnë poshtërim të përsëritur të viktimave dhe të dashurve të tyre, dhe në të njëjtën kohë, zgjasin padrejtësinë dhe rrezikojnë marrëdhëniet paqësore shoqërore”, tha Inzko përmes një letre, ku ka arsyetuar vendimin e tij, ka bërë të ditur rel.

Siç ishte bërë e ditur, ky vendim parashikon burgim nga tre muaj deri në tre vjet, për të gjithë ata persona që publikisht nxisin dhunë ose urrejtje ndaj një grupi personash ose ndaj një anëtari të një grupi racor, fetar apo që ka kombësi e origjinë tjetër etnike.

Ndërkaq, dënim deri në gjashtë muaj deri në pesë vjet, do t’iu shqiptohet të gjithë personave që publikisht mohojnë, minimizojnë apo përpiqen të justifikojnë një krim të gjenocidit, krimet kundër njerëzimit apo krimet e luftës, thuhet në vendim.

Vendimi, sipas Zyrës së Përfaqësuesit të Lartë (OHR), përcakton që kushdo që jep mirënjohje, çmim ose ndonjë privilegj të ngjashëm për një person të dënuar për gjenocid apo për ndonjë krim lufte, ky akt do të dënohet të paktën me tri vjet burgim.

Kjo vlen edhe nëse emërtohet një objekt publik siç është rruga, sheshi, parku, ura, institucioni, komuna ose qyteti, vendbanimi, me një emër të një personi të dënuar për gjenocid, një krim kundër njerëzimit ose krim lufte ose në ndonjë mënyrë tjetër madhëron një person të dënuar me gjykim të formës së prerë për këto vepra penale.

Ky ligj do të hyjë në fuqi tetë ditë pas botimit në faqen zyrtare të internetit të Zyrës së Përfaqësuesit të Lartë ose një ditë pas botimit në “Gazetën Zyrtare të Bosnjë dhe Hercegovinës”, cilado që ndodh më shpejt. Ndërkaq, vendimi i Inzkos hyn menjëherë në fuqi. /Telegrafi/