Djali i El Chapo u ekstradua nga Meksika në SHBA

Ovidio Guzman Lopez, djali i bosit meksikan të drogës, Joaquin “El Chapo” Guzman, është ekstraduar nga Meksika në Shtetet e Bashkuara, ka bërë të ditur Departamenti Amerikan i Drejtësisë.

Ekstradimi ishte një “rezultat i bashkëpunimit të zbatimit të ligjit të Shteteve të Bashkuara dhe Meksikës”, tha Prokurori i Përgjithshëm, Merrick B. Garland, në një deklaratë të premten që i referohej Guzman si një “udhëheqës i kartelit Sinaloa”.

“Ky veprim është hapi më i fundit në përpjekjen e Departamentit të Drejtësisë për të sulmuar çdo aspekt të operacioneve të kartelit”, shtoi Garland.

Lexo po ashtu Kush është Ovidio Guzman, djali i ‘El Chapo-s’ dhe pse njihet me nofkën “El Raton”?

Guzman u dërgua në Chicago, tha për CNN-in, Ndihmës Prokurori i SHBA-së, Joseph D. Fitzpatrick.

Një paraqitje fillestare në gjykatë nuk është caktuar, por zyra e Prokurorit të SHBA-së pret që ajo të ndodhë të hënën.

Guzman u arrestua nga autoritetet meksikane në muajin janar të këtij viti pas një operacioni dramatik në shtetin verior të Sinaloa që shkaktoi 29 viktima dhe që atëherë ka qenë në paraburgim. SHBA ka kërkuar ekstradimin e tij për trafikim droge.

Të paktën 19 anëtarë të dyshuar të bandës dhe 10 personel ushtarak vdiqën gjatë atyre përleshjeve. Nuk raportohet për të vdekur apo plagosur civilë.

Guzman ishte arrestuar më parë në muajin tetor të vitit 2019, por u lirua me urdhër të presidentit meksikan, Andres Manuel Lopez Obrador për të shmangur gjakderdhjen dhe më pas u fsheh deri në arrestimin e ri në vitin 2023.

Ekstradimi vjen pas lirimit nga një burg amerikan i Emma Coronel Aispuro, gruas së El Chapo, të mërkurën. Ajo ishte në burg për gati dy vjet shkaku i trafikimit të drogës dhe pastrim parash.

Lexo po ashtu Grupet e armatosura marrin nën kontroll aeroportin "Culiacan" - kundërshtojnë ekstradimin e Ovidio Guzmanit në SHBA

Shteti i Sinaloa, ku ndodhet Culiacan, është shtëpia e një prej organizatave më të fuqishme të narkotikëve në botë, Karteli Sinaloa, lideri i të cilit ishte “El Chapo”.

Departamenti Amerikan i Shtetit beson se Guzman dhe vëllai i tij, Joaquin Guzman-Lopez, “trashëguan një pjesë të madhe të të ardhurave nga narkotikët” pas vdekjes së një vëllai tjetër, Edgar Guzman-Lopez.

Ai pretendon se ata “filluan të investonin sasi të mëdha parash në blerjen e marihuanës në Meksikë dhe kokainës në Kolumbi”.

Vëllezërit gjithashtu supozohet se mbikëqyrin rreth 11 “laboratorë të metamfetaminës në shtetin e Sinaloa”, sipas Departamentit të Shtetit.

Lexo po ashtu Pasagjerët në panik kur aeroplani u sulmua me armë zjarri pas arrestimit të djalit të El Chapos

Babai i Guzman, “El Chapo”, u arratis në mënyrë të famshme nga burgu i Altiplanos më 11 korrik të vitit 2015, përmes një tuneli kilometër të gjatë që shfaqte një motoçikletë në shina.

Ai më vonë u kap dhe u dënua në SHBA për 10 akuza, duke përfshirë përfshirjen në një sipërmarrje të vazhdueshme kriminale, trafikim droge dhe akuza për armë zjarri.

Ai u dënua me burgim të përjetshëm plus 30 vjet dhe u urdhërua të paguante 12.6 miliardë dollarë si dëmshpërblim. /Telegrafi/