‘Disa minuta në qiell

Pothuajse çdo fundjave, apo çdo herë kur moti është i mirë, i gjen në këtë vend.

Marrin pajisjet e nevojshme, bëjnë gjithçka gati dhe kalojnë për disa minuta në qiell.

E një fluturim i tillë, duke parë gjithë vendin poshtë miniaturë, është diçka shumë e veçantë. Të jep ndjesinë që je sipër në re.

Pikërisht para 7 viteve, personazhi jonë i sotëm, kishe parë disa njerëz duke fluturuar, duke bërë paraglide. Pasi që i kishte bërë shumë përshtypje, kishte filluar të hulumtojë rreth këtij sporti ekstrem, dhe ka vendosur të filloj të merret me të.

Në fillim i është dukur pak i vështirë, mirëpo me kalimin e kohës i është bërë pasion. Safet Sylaj, thotë që më këtë sport mund të merresh gjatë tërë vitit.

‘’Kjo është njëra ndër stazat më të bukura që kemi në territorin e Kosovës, e jo etëm në Kosovë po edhe njëra ndër stazat më të mira në Evropë. Si aktivitet e fluturimit me parashutë e kam filluar para 7 viteve. Fluturimi i parë ka qenë në kodrat e Goleshit edhe me mësuesit Fadil Gërguri dhe Gzim Statovc, tek të cilët I kam marr hapat e parë në këtë sport. Eksperiencën besoj që e kemi arrit, sepse kemi pas përvoja të mira. Sporti jonë ka aktivitet gjatë 12 muajve të vitit’’, tha Sylaj.

E jo të gjithë kanë guximin për një fluturim të tillë. Nazmi Gashi, tregon disa nga rastet interesantë që iu kanë ndodhë.

E secila velë ka të veçantat e saj, dhe peshën e saj. Po ashtu dallojnë edhe llojet e fluturimeve.

‘’ Më interesantja ka qenë këtu prej Greikocit, një djali i ri, entuziast, mirëpo ku u shkëputem në ajër, e vërejsha një dyshim tek ai, më kërkoi tha nëse du mu ndal a mundemi, dhe unë thash po more, sepse nuk besova që kërkon një gjë të tillë. Kur u ngritëm me një lartësi diku mbi 900 metra, tha ndalma, thash në rregull veç prit ta zgjedhim një terren më të përshtatshëm, sepse ishte e pamundshme me u ndal aty, filloj duke komunikuar me të edhe e kaloj frikën dhe fluturimi shkoj për mrekulli.’’, u shpreh Gashi.

Kjo pikë e fluturimit, që gjendet në fshatin Greikoc në Komunën e Suharekës, në 1000metra lartësi mbidetare, së shpejti do të jetë pikë ndërkombëtare e sporteve ajrore.

Kjo ishte edhe pika prej ku e provova për herë të parë fluturimin paragliding, që edhe pse nuk zgjati më shumë se 20 minuta, ishte një prej ndjenjave më të veçanta të jetës sime.

E për fluturimet paragliding, është edhe klubi, ku numëron disa anëtarë. Ata marrin pjesë në gara të shumta, si në vend ashtu dhe në shumë gara ndërkombëtare.

‘’ Jemi 5 pilot të licencuar, jemi aktivë dhe pjesëmarrës në gara si brena vendit ashtu edhe ndërkombëtare. Federata e Kosovës ka bashkëpunim të gjithë anshëm më Federatën e Shqipërisë, dhe kemi një kampionat të përbashkët vjetor. Disa gara varësisht prej kalendarit që caktohet gjatë vitit, mbahen në Kosovë e disa në Shqipëri. Në si Kosovë mundem me thanë që jemi të pranuar ndërkombëtarisht, dhe në renditjen botërore jemi në vendin e 13.’’

E të gjithë ata që duan të provojnë një adrenalinë të tillë, trajnerët janë gjithmonë aty dhe për ju. /RTVDukagjini/