Dikur vizitoi vendet “parajsë në tokë”, sot e quan veten “roje jozyrtar i natës” – rrëfimi i burrit i cili ka shtatë vjet që netët i kalon në një park publik në Angli

Një burrë i moshuar ka kaluar shtatë vitet e fundit duke fjetur kryesisht në një park publik pasi është përballur me një gjendje të vështirë ekonomike.

Sipas mediave të huaja, përcjell Telegrafi, Brian, 73 vjeç, i cili është me origjinë nga Zelanda e Re, jeton në strehën e tij “me tre këmbë” në Cornwall që nga 2012, kur vendosi të jetojë “jetën më të thjeshtë”.

Ai e quan veten “roje jozyrtar i natës” të parkut.

Duke folur për mediat britanike, Brian ka thënë: “Kur unë erdha për herë të parë këtu në shtator të vitit 2012 unë nuk mund të vendosja se ku doja të shkoja”.

Madje, tanimë Brian është i njohur në zonë dhe shpesh njerëzit do t’i sjellin atij ushqim dhe do të ndalen për një bisedë.

E vetmja kohë që ai duhet të lëvizë është kur luhen ndeshjet e futbollit aty – gjë e cila në motin aktual nuk është shumë shpesh.

Sidoqoftë, jeta e tij sot është një kontrast i ashpër me vitet e tij të rinisë.

Sipas mediave, 73-vjeçari zbuloi se ai ishte pilot i linjës ajrore dhe ka qenë në vendet që shumica e njerëzve vetëm mund t’i ëndërrojnë.

“Hawaii dhe Fiji janë si parajsa në tokë”, thotë ai ndërsa kujton kohërat e vjetra.

Ai thotë se ka punuar për OKB-në në Vietnam dhe ka parë kuptimin e vërtetë të varfërisë ndërsa punonte në disa nga vendet më të varfra afrikane në vitet 1970.

Kur ai dështoi në ekzaminimin e tij mjekësor, ai humbi licencën e pilotit dhe u transferua në Londër për “një fillim të ri”.

“Karriera ime mbaroi shumë befas, kështu që fillova një tjetër në Londër”, rrëfen ai.

Ai punoi si kuzhinier në Londër, Birmingham dhe Torquay por jeta e tij mori një kthesë dramatike në mesin e viteve ’60.

Brian, i cili ka një djalë në Zelandën e Re, tha se ka të ngjarë të kalojë Krishtlindjet vetëm në strehën e tij, por një mik i ngushtë të cilin ai dikur e ndihmonte ndërsa ishte në rrugë, do t’i sjellë darkë Krishtlindjesh. /Telegrafi/