Digne falënderon Romën për ngritjen në karrierë

Mbrojtësi i krahut i Barcelonës, Lucas Digne, thotë se nuk do të ishte duke luajtur për kampionin spanjoll po të mos ishte falë Romës.

Francezi u transferua te gjiganti spanjoll në fillim të sezonit aktual duke shkuar atje nga Paris Saint-Germaini. Mirëpo, 23-vjeçari e kaloi sezonin paraprak (2015/2016) si huazim te Roma, skuadër me të cilën zuri vendin e tretë në Serie A.

Lexo po ashtu Zyrtare: Digne i Barcelonës (Foto)

Dhe pikërisht ky është klubi të cilin lojtari e falënderon për hapin e madh në karrierën e tij.

“Ishte një vit fantastik, për shkak të dashurisë së tifozëve. Klubi më dha shumë vetëbesim dhe i falënderoj, sepse pa ta nuk do të isha këtu, prandaj ka qenë mahnitëse”, ka deklaruar Digne për Omnisport.

Roma vazhdon të jetë e pafuqishme për ta rrëzuar Juventusin nga froni, ndërsa mbrojtësi mendon se të zgjedhurit e Luciano Spallettit kanë fuqi për ta bërë këtë.

“Nuk e di nëse është shumë vështirë (të arrihet Juventusi). Juve ka një skuadër të shkëlqyer qe shumë vite, ky klub po punon mirë në çdo aspekt”.

“Por, Roma ka pasur sukses në tre-katër vitet e fundit, prandaj po afrohen dalëngadalë, në vitin e kaluar ishin shumë mirë. Këtë vit nuk janë shumë larg, prandaj mund të bëjnë diçka”, është shprehur Digne. /Telegrafi/