Dhuna e edukatorëve ndaj trevjeçarit, Nagavci: Nuk është rast i izoluar, do të marrim masa ndaj abuzuesve të fëmijëve

Ministrja e Arsimit, Shkencës dhe Teknologjisë, Arbërie Nagavci ka thënë se do të marrin të gjitha masat ndaj edukatorëve që janë përfshirë në rrahjen e një trevjeçari në një kopsht publik në Fushë Kosovë.

Nagavci para mediave deklaroi se rasti i dhunës ndaj trevjeçarit nuk është i izoluar, transmeton Telegrafi.

“Inspektorët e arsimit janë atje, pres dhe do të sigurohem që si ministre të merren të gjitha masat që janë të parapara ndaj abuzuesve të fëmijëve tanë. Jam tejet e shqetësuar që nga ato pamje duket se nuk është rast i izoluar, nuk është vetëm reagim i një edukatore por shihet se është më shumë se një person, që kanë qëndruar indiferente ndaj rastit”, ka bërë të ditur ajo.

Ministrja potencoi që sa do ligje të mira të kenë, pa vetëdije dhe bashkëpunim të plotë të institucioneve nuk mund të jenë të qetë që fëmijës i sigurohet një ambient i mirë.

Lexo po ashtu U rrah nga tri edukatore, publikohen pamjet se si u lëndua trevjeçari në një kopsht në Fushë Kosovë

“Presim raportin e inspektorëve dhe besoj edhe Komuna e Fushë Kosovës ka marrë masat. Nuk do të tolerojë raste të tilla”, shtoi mes tjerash ajo.

Ndryshe, të hënën, një qytetar në rrjetin e tij social në Facebook ka njoftuar se nipi tij është rrahur nga tri edukatore.

“Të nderuar media dhe prindër! Dua të ndaj me ju diçka të tmerrshme që sapo ka ndodhur në Fushë Kosovë, në çerdhen shtetërore të fëmijëve “Gëzimi Ynë”, është rrahur brutalisht nipi im Lisi, vetëm 3 -vjeç. Shikoni kamerat ku shihet qartë që po rrihet e tërhiqet zvarrë, me pas e dërgojnë në një dhomë pa kamera dhe e rrahin pa mëshirë të tri mësueset e kësaj k***e”.

Lexo po ashtu Flet nëna e 3-vjeçarit: Djali ka probleme shëndetësore, edukatoret nuk e ushqyen

Lidhur me rastin, drejtori i Arsimit në Fushë Kosovë ka njoftuar se Policia është duke intervistuar edukatoret, ndërsa tha se do të pezullojnë nga puna personat që u përfshinë në rastin e dhunës.

Telegrafi ka provuar të marrë edhe një deklaratë nga drejtoresha e kopshtit “Gëzimi ynë”, por që e njëjta nuk është lajmëruar.

Për rastin ka pasur reagime të shumta, ndërsa nëna e trevjeçarit para mediave tha se djali ka edhe disa probleme shëndetësore. /Telegrafi/