Deutsche Welle: Parajsa e investuesëve, Maqedonia është ankth për punëtorët

Deutsche Welle i ka kushtuar një analizë hapjesë së fabrikave nga investues të huaj dhe punësimit të njerëzve, të titulluar si ”Parajsa e investuesëve, Maqedonia është ankth për punëtorët”, njofton Telegrafi Maqedoni.

Sipas kësaj analize, atyre që gjejnë punë në Maqedoni, u thuhet të jenë të lumtur, megjithatë është e paqartë nëse ky fat është i mirë, apo i keq, pasi që mbrojtjet minimale ekzistuese për një punëtorë, injorohen paturpësisht.

Gorani është protagonisti i kësaj analize. Ai tregon se si bën 60 kilometër rrugë, për të punuar në fabrikën gjermane ”Dräxlmaier”, ku punon në montimin e komponentave elektronike për brendin Mercedes, për një rrogë prej 180 euro në muaj.

Për të mos e humbur vendin e tij të punës, Gorani përdor për Deutsche Welle emrin e rrejshëm ”Goran”. Ai thotë se nuk dëshiron të ketë kushte pune si në Gjermani, por të paktën të jenë kushte të mira, duke përmendur temperaturat e larta të verës, ndërkaq në vendin e punës së tij nuk ka kondicioner ajri.

Analiza në fjalë thotë se me mijëra punëtorë në Maqedoni e kanë fatin e njëjtë të punës si të Goranit, duke përmendur rastin e një nëne që punon në firmën amerikane ”Johnson Controls” në Shtip, ku prodhohen pjesë automobilash, e cila ankohet se mbikëqyrësit u bëjnë shumë trysni gjatë punës dhe i kërcënojnë se do t’i largojnë nga puna.

Punësimi zë vendin e vet në këtë analizë. Përmenden faktet se është ulur papunësia, megjithatë vazhdon të mbetet në 25% dhe se gjysma e të papunëve janë më të rinj se 29 vjeç, kurse rroga mesatare në Maqedoni është 350 euro, por rreth 70% e të punësuarve marrin më pak rrogë se kjo mesatare.

Me këtë rast, Deutshce Welle krahason një rrogë mujore në dy firmat e lartëpërmendura, e cila është sa një ditë punë tetëorëshe në BE, ndërkaq punëtori në këto fabrika punon më gjatë brenda ditës, përfshirë edhe ditën e shtunë.

Në lidhje me standardet ndërkombëtare të punës, Deutshe Welle sjell përgjigjen e Dräxlmaier Group, e cila pretendon se i zbaton këto standarde në Maqedoni. Qeveria e Maqedonisë vazhdon të reklamojë vendin si një parajsë investimi, duke theksuar rrogat e ulëta.

Duke përmendur rritjen e Bruto Prodhimit për thuajse 3% në vit, Deutsche Welle konsideron se Maqedonia ka një ekonomi me rritje më të shpejtë në rajon, por që vazhdon të mbetet ndër vendet me popullatë më të varfër në Evropë. Analizën e plotë e gjeni këtu./Telegrafi/