Deputetja e AAK-së kërkon të hiqet ora policore gjatë muajit të Ramazanit

Deputetja e Aleancës për Ardhmërinë e Kosovës, Time Kadrijaj ka kërkuar nga Qeveria e Kosovës që të largojnë orën policore gjatë muajit të Ramazanit.

Kadrijaj thotë se “rishikimi i masave të reja nga Qeveria e Kosovës nuk sjell ndonjë dobi në të mirë të qytetarëve siç nuk ka ndryshuar asgjë në dy javët e kaluara”.

“Sidomos e është panevojshme ora policore gjatë natës kur tani jemi në Muajin e Shenjtë të Ramazanit dhe qytetarët që agjërojnë kanë nevojë të shërbehen me ushqime që i praktikojnë gjatë këtij muaji. Psh: në syfyr nuk shkon gjithë familja në furrë por një pjesëtar i familjes dhe nuk krijohen masa të mëdha të njerëzve”, ka thënë ajo në një postim në Facebook.

Deputetja ka thënë se nëse ora policore nuk hiqet, mund ta zgjasin deri në ora 02:00 të drejtën për lëvizje.

“Andaj për respekt të muajit Ramazan, kërkoj nga Qeveria e Kosovës të rishikojnë vendimin për orë policore, ta heqin krejt ose të vendosin në vend të orë 5:00 në ora 2:00. Nëse nuk mund të iu ndihmojmë më shumë atëherë të paktën mos t’i pengojmë të paktën gjatë këtij muaji kur e dimë që shumë qytetarë janë gjobitur me nga 200 euro për një pitalkë ose një byrek që janë shërbyer gjatë orës policore”, ka theksuar ajo.

Me masat e reja të vendosura nga Qeveria e Kosovës, sektori i gastronomisë lejohet të punojë deri në ora 22:00, kurse pas orës 22:30 është vendosur ora policore. /Telegrafi/