Deliu-Kodra: Një Komision Hetimor do ta zbardhte keqmenaxhimin e situatës energjetike në vend

Deputetja e Partisë Demokratike të Kosovës (PDK), Blerta Deliu-Kodra ka thënë se një Komision Hetimor do ta zbardhte keqmenaxhimin e situatës energjetike në vend.

Duke folur gjatë një konference për medie, ajo ka theksuar se gjatë ditës së nesërme do të mbahet një seancë ku do të diskutohet për rritjen e çmimeve të energjisë.

“Kriza energjetike që ka prekur vendin, është propozuar që të ketë një komision hetimor për të parë menaxhimin e krizës energjetike nga ana e Qeverisë së Kosovës”, tha Deliu-Kodra, përcjell Telegrafi.

Lexo po ashtu Kuvendi nesër mban seancë të jashtëzakonshme për rritjen e çmimeve

Ajo tha se duke pa gjendjen e rëndë të qytetareve kanë propozuar disa iniciativa, si çështja e Trustit, rregullimi i çmimeve të produkteve medicinale dhe kriza energjetike.

“Nesër është thirrur një seancë e jashtëzakonshme për rritjen e çmimeve. Duke parë gjendjen e rëndë ekonomike me rritjen e çmimeve, ne kemi propozuar disa iniciativa. E para është çështja e Trustit, si shumë e nevojshme që qytetarët e Kosovës të arrijnë që ta marrin një pjesë që ta përballojnë gjendjen e rëndë me këtë rritje të çmimeve. Si pikë e dytë është rregullimi i çmimeve të produkteve medicinale”, ka përfunduar ajo.

Ndërsa, deputeti i LDK-së, Driton Selmanaj ka thënë se në këtë seancë do të kërkohet miratimi i rezolutës kundër rritjes së çmimeve në Kosovë.

“Kemi ftuar mbajtjen e një seance të jashtëzakonshme për rritjen e çmimeve, ku në fund të debatit do të propozohet një rezolutë, në mënyrë që të nxjerr obligime konkrete dhe detyra të qarta për Qeverinë e Kosovës, sepse jemi dëshmitar të asaj se Qeveria është shndërruar në një spektatore, duke e rënduar gjendjen e qytetarëve”, tha Selmanaj. /Telegrafi/