Del në shitje Ferrari i vitit 1957, me një çmim marramendës (Foto)

Në fillim të muajit të ardhshëm, do të dalë në ankand në ngjarjen “Articular Motorcars Sallon Retromobile” edhe modeli Ferrari 335 S Spider Scaglietti i vitit 1957.

Sipas disa vlerësimeve, ky model do të kushtojë 28 deri 32 milionë euro.

Fjala është për modelin 335 S me tipin e shasisë 520/B, i cili në fillim është lansuar si modeli 315 S me motor 3.8-litra V12, dhe mori pjesë në garën “12 Hour Race of Sebring” (“12 orë garë e Sebringut”), transmeton Koha.net. Më vonë, ky model është bërë me motorin 4.1-litër V12 me kapacitet prej 400 kuajfuqi, ndërsa në garën “24 Hours Race of Le Mans” (“24 orë garë e Le Mansit”) e kanë vozitur shoferët e njohur si Mike Hawthorn dhe Luigi Musso.

Ferrari 335 S Spider Scaglietti mori pjesë edhe në gara të tjera botërore, të tilla si “6 Hours Race of Kristianstad” në Suedi, “Grand Prix” në Venezuela dhe Kubë, si dhe “Road America 500”.

Shoferi më i njohur në botë, Stirling Moss, gjithashtu e ka vozitur këtë model, gjë që ia ka rritur vlerën edhe më shumë.