Dashuria ndaj shqiptares, austriakut ia mësoi gjuhën shqipe (Video)

Dashurinë e vërtetë ia fali një shqiptareje. Dhe lidhja e tij me vajzën nga Shqipëria e mëshiroi gati me gjithçka që kishte populli i lashtë ilir në Ballkan.

Austriaku Simon Rieger i cili jeton në Vjenë, edhe pse nuk e vazhdoi lidhjen e tij të dashurisë me vajzën shqiptare, gjuhën që ajo e fliste vazhdon ta mësoj edhe sot e asaj dite.

Rieger, i cili ka ardhur për herë të parë në Kosovë, tregon për nivelin e kurseve dhe mësimit që ka marrë nga mësues të gjuhës shqipe.

“Kontakti i parë me shqipen e kam pas nga ish e dashura ime e cila ka qenë nga Shqipëria, me prindër nga Shqipëria, dhe gjatë vizitës sime në Shqipëri e kam pas kontaktin e parë me kulturën shqiptare. Po ashtu, në universitetin ku kam studiuar në Austri ka pas një kurs për kohën e mesjetës në Ballkan dhe ndërkohë profesori i asaj lënde që mbahet është edhe këtu për Seminarin dhe kursin që mbahet në Prishtinë. Jam në nivelin e parë të studimeve të gjuhës shqipe, në nivelin bazik në fakt”, ka thënë ai.

Simon Rieger i cili studion në Fakultetin e Edukimit, ku pas diplomimit do të kualifikohet si mësimdhënës për shkollimin e mesëm, thotë se mësimet që i ka marrë në kursin e Seminarit në Prishtinë, janë bazike.

Megjithatë, Rieger shprehet i kënaqur me atë çfarë ka mësuar.

“Unë kam mësuar gjëra bazike, në fakt ato çfarë kam pritur nga niveli i parë pasi që nuk e kam njohur më herët gjuhën shqipe dhe jam i kënaqur me atë që kam arritur ta mësoj për gjuhën shqipe”, tha ai.

Por, përveç mësimeve që po i merr për gjuhën shqipe dhe kulturën në përgjithësi, Simon Rieger gjatë këtij organizmi thotë se ka pas mundësi edhe t’i vizitoj disa vende të Kosovës, për të cilat vende tregon se i kanë pëlqyer shumë.

Rieger thotë se kur ecë rrugëve të kryeqytetit të Kosovës, ndjehet rehat duke i parë njerëzit që e rrethojnë.

“Nuk kam parë shumë nga Kosova përveç Prishtinës dhe Prizrenit. Që të dyja janë qytete shumë të bukura, ndërsa Prishtina është një qytet ku ndjehesh shumë rehat dhe ndjehesh shkëlqyeshëm edhe në kohën kur ecë rrugëve dhe takon njerëzit e ndjen një ndjenjë të mirë kur i sheh njerëzit”, ka theksuar Rieger.

Austriaku që në vizitën e tij të parë në Kosovë, thotë se byreku është një nga ushqimet që i ka pëlqyer më së shumti, e sidomos nëse shijohet në pjesën e vjetër të Prishtinës.

“Sa i përket ushqimit, byreku është shumë i mirë por nuk mund ta ndaj edhe nga ushqimet tjera tradicionale që i kam provuar këtu. Ndërsa sa i përket kafiterive në Prishtinë nuk mund ta ndaj ndonjë vend të veçantë, kudo që rri ndjehem mirë ndërsa një pjesë andej kah Xhamia dhe pjesa e vjetër e qytetit më pëlqen jashtëzakonisht shumë”, tha Rieger.

Ai thotë se nga qëndrimi në Kosovë ka kuptuar se njerëzit këtu janë shumë të mirë, të sjellshëm dhe të gatshëm gjithmonë që të ndihmojnë.

Simon Rieger thotë se Kosova i ka dhënë ndjenjë shumë të mirë dhe po t’i jepej mundësia do të vinte edhe herëve tjera. /Telegrafi/