Daniel Serwer: Dodik dhe Vuçiq mund të organizojnë në Bosnje një sulm si në Banjskë

Konferenca “Politika e administratës së Joe Biden ndaj Bosnje dhe Hercegovinës: 30 vjet Federata e BiH” u mbajt në Sarajevë, ku folësi kryesor ishte Daniel Serwer, ish i dërguari i posaçëm amerikan në Bosnje-Hercegovinë.

Në fillim të fjalës së tij, njohësi i Ballkanit shprehu mirënjohjen për mikpritjen që iu bë dhe vlerësoi qytetin e Sarajevës.

“Është e mrekullueshme të jesh përsëri në Sarajevë, një nga qytetet më të bukura në botë. Shumëçka ka ndryshuar që kur erdha në vitin 1994. Dua t’i kujtoj të gjithëve se si dukej Sarajeva. Atëherë rrugët ishin bosh, pa vetura dhe njerëzit ishin të izoluar dhe të ndarë. Civilët duhej të mësonin ku të ecnin në mënyrë që të mos ishin në shënjestër të snajperëve. Madje edhe aeroplani im u godit kur zbrita në Sarajevë për herë të parë”, pohoi ai.

Serwer beson se entitetet në Bosnje dhe Hercegovinë janë në një situatë të palakmueshme, shkruan klix.ba.

Lexo po ashtu Dodik: Fillimisht demarkacion, pastaj shpërbërje të Bosnjës

Analisti amerikan dhe njëkohësisht profesor në universitetin John Hopkins shtoi se Bosnja dhe Hercegovinës po i kërcënohet paqja.

“Fatkeqësisht, Bosnja dhe Hercegovina duhet të jetë gati për luftë. Milorad Dodik dhe Aleksandar Vuçiq kanë treguar dhe shpalosur qartë qëllimet e tyre. Ata po krijojnë një botë serbe që duhet të largojë Republikën Serbe nga institucionet e Bosnje dhe Hercegovinës. Ne pamë se çfarë u përpoqën të bëjnë vitin e kaluar në Banjskë, në Kosovë. Ishte një provokim për të provokuar një reagim, i cili do t’i lejonte më tej Serbisë ose Republikës Serbe të ndërhynte. Ushtria boshnjake, EUFOR dhe NATO duhet të jenë gati për “burrat e gjelbër” dmth lloji i operacionit që rusët kanë kryer tashmë në Krime. Vetëm kur Dodik dhe Vuçiq të jenë të vetëdijshëm se do të ketë një përgjigje të shpejtë ushtarake, atëherë mund të jemi të sigurt se ata nuk do të tentojnë një veprim të ngjashëm siç e pamë në Banjskë”, deklaroi ai.

Ndryshe, Serwer ishte zëvendës shef i misionit dhe i ngarkuar me punë në Ambasadën Amerikane në Romë nga viti 1990 deri në 1993 dhe nga 1994 në 1996, i dërguar special dhe koordinator për Bosnje dhe Hercegovinën. Gjatë këtij kohe, Serwer ndërmjetësoi për t’i dhënë fund luftës në vitin 1994 dhe negocioi marrëveshjen e parë të arritur në bisedimet e paqes të Dejtonit të vitit 1995. /Telegrafi/